Ich Jorig der Tintler (?) von Chrizendorf zu den zeiten amptman des erbern herren hem Reinprechts von Walsse von Enns Vergich offenleichen an disem brief, daz fu^er mich chom für rechtz gericht der erber man Leupolt, zu den zeiten hern Jacobs diener von Eslarn, purger ze Wienne, vnd chlagt mit vorsprechen an des selben seins herren stat auf Fridreichs weingarten an der Rawberinne, der do leit ze Chritzendorf, ze nest Chvnrats weingarten des Chlainen vmb zehen vnd funf schilling wienner phenning versezzens purchrechts vnd vmb alle die zwispilde, die mit recht dar auf ertailt sint, als ver, daz (?) ich im mit recht poten dar auf gab Vlreichen den Perchgozzer von Nidern Chritzendorf vnd Leupolten von Chritzendorf, di zwen erber man, di habent auch mit iren trewn darvmb gesagt vor rechtem gericht, als sev ze recht scholten, daz sev den weingarten mit sampt den vmbsezzen haben beschawt vnd geschaczt, daz er so tewr nicht en ist, als das versezzen purchrecht vnd di zwispilde, di mit recht darauf ertailt sint. Vnd wart gevragt, waz recht wer. Do geviel dem vorgenanten Leupolten do mit vrag vnd mit vrtail, er scholt mir mein recht geben, daz hat er getan, vnd scholt ich in des weingarten gewaltich machen vnd an die gewer setzen, daz hab ich auch getan, dem vorgenanten hern Jacoben von Eslarn furbaz ledichleichen vnd vreyleichen ze haben vnd allen seinen frvmen do mit ze schaffen, verchauffen, versetzen vnd geben, swem so er welle an allen irrsal. Vnd wande ich selber aigens insigils enhan, dar vber gib ich im disen brief ze einem offen vrchunde versigilt mit der erbern lewt insigiln hern Andres zu den zeiten des vorgenanten meins herren schaffer hern Reinprechts von Walsse von Enns, hern Vlreichs von Chritzendorf zu den zeiten des probsts amptman von Nevnburch, di diser sache gezewg sint mit iren insigiln. Der brief ist geben nach Christs geburde draitzehen hundert iar, dar nach in dem funftzigistem iar des nagsten mantags vor dem phingstag.

Source Fulltext: OÖUB 7 (Wien 1876) S. 185, Nr. 183