Ich Jans von Chappelln vergich an disem prief allen den, di in sehent oder ho^ernt lesen, daz ich mit gu^etleichem willen aller meinner erben ze rechttem lehen gelihen han Perichtolden dem Leutzendorffer vnd seinner hausvrowen Petersse vnd alln iern erben ain hoff, ist genant in dem Hage vnd ist gelegen in Nev^enchircher pharre pei der Yffe, mit allen den rechten vnd nutzen han ich in gelihen den vor geschriben hoffe mit holtz, mit velden, mit wissmaden, swie daz genantt ist also beschaidenleichen, daz ich dez vorgenanntten hoffs ier herr vnd ier scherm vnd ier gewer pin nach landes recht in O^esterreich an als gever vnd dar vber, daz in disev red stet vnd vnzeprochen peleib von mier vor genantten Jansen von Chappelln vnd von alln mein erben, dar vber gib ich in disen prief versigelt mit meinem anhangvndem insigel. Der prief ist geben, do man zalt von Christes gepuerdt drevtzehen hundert iar, dar nach in dem fu^emftziksten jar an sand Stenphans (sic) tag.

Source Fulltext: OÖUB 7 (Wien 1876) S. 214, Nr. 213