Ich Marchart der Ponhalm vnd mein hausvraw ver Agnes vnd mein su^en Reinprecht vnd Philipp vnd mein to^echter Katrey, Peters, Agnes vnd Asann vnd all vnser erben, di wir haben oder nach gewinnen, veriehen vnd tün chunt offenbar an disem prief allen den, di in sehent oder horent lesen, di nu sind oder her nach chumftig werdent, daz wir mit wol bedachtem mut vnd mit gunst vnd rat aller vnsrer vreunt vnd erben zu einem ewigen selgeret geben haben ledichleichen zu der zeit, do wir iz wol getu^en mochten, dem ersam gotshaus dacz sand Florian vnd besunderleich dem guster ampt daselbs ein gu^et haizzet Aczengarr, daz gelegen ist in Sirnicher pharr, daz vnser vreys aygen ist gewesen, vnd daz ich vorgenanter Marchart der Panhalm vmb mein aigenhaffts gu^et geehauft han, da man von auch ja^erleich dient sechs schilling phenning wienner mu^enzz an vnser Vrowen tag zder dienst zeit, also daz iz ein guster dacz sand Florian sol ewichleichen inn haben mit allen reehten vnd nuczen, als wier iz inn gehabt haben, mit so^elher beschaidenhait, daz er mier den vorgenanten Marcharten dem Ponhalm alle jar begen haizze meinen jartag mit fumf schilling phenning, di er vnder di herren tail also, daz man mir dez nachsten tags nach sand Bartholomes tag an dem abent sing vigili vnd dar nach des morgens selmeczz. Wir verzeihen vns auch dez vorgenanten gu^ets ga^enczlich vnd gar also daz wier noch vnser erben nimmermer dhain ansprach dar auf haben sullen, vnd sullen auch dez vorgenanten gu^etes gewer vnd scherm sein, wo dez dem vorgenantem gotshaus dacz sand Florian vnd besunderlich dem guster ampt da selbs du^erft geschicht, als aygens recht ist in O^estereich. Vnd daz daz also stet vnd vnuerchert beleib, dar vber gib jch oftgenanter Marchart der Panhalm disen offen prief versigelten mit meinem anhangunden jnsigel. Der prief ist geben nach Christi gepurd vber dreuczen hundert jar, dar nach in dem fumfczikisten jar an sand Cholmans tag.

Source Fulltext: OÖUB 7 (Wien 1876) S. 204f., Nr. 204