Ich Alber der Hutter vnd allev meinev geswistreid wier veriehen vnd tu^en chunt allen den, die disen prief sehent oder ho^erent lesen, di nu lebent oder hernach chu^eftig (sic) werdent, daz ich mit wolbedachtem mu^et vnd gunst aller meiner geswistreid vnd aller meiner eriben zv der zeit, do ich ez wol getu^en mocht, gegeben han dem ersam chloster dacz sand Florian meines rechten aygens neun schilling geltes, daz gelegen ist dacz Weithersdorf auf wehaustem gu^et. Ich han in awer den vorgenanten gelt gegeben ze wider wechsel vmb ein weingarten, der do haizzet der Pochsfu^ez, den Symon der Hutter diener geschaft hat ab seiner sel zv einem ewigen selgeret, daz manigem mann chunt vnd gewizzen ist. Wer awer, daz yem des vorgenanten weingarten pezzer erib wolt sein, der schol dem vorgenanten Albern dem Hutter vnd sein geswistreiden fufcig phunt phenning gewen an all wider red. Wier geben auch die vorgenanten neun schilling dem egenanten chloster also, daz man dem vorgenanten Symon, der der Hutter diener ist gewest, alle iar sein iarczeit schol wegen mit vigili vnd mit selmesse, als des chloster gewanheit ist, vnd schol man dann die neun schilling phenning vnder die herren gewen. Ich pin auch ich vorgenanter Alber vnd allev meinev geswistreid der vorgenanten neun schilling des vorgenanten chlosters gewer für alle ansprach fu^er all eriben, als des landes recht ist in Asterreich. Vnd daz die red stet vnd vnczbrochen weleib, dar vber gib ich vor genanter Alber der Hutter disen prief versigelt mit meinem insigel. Vnd sind diser sach geczeug Ott der Hutter vnd Jans der Hutter mit ieren anhangunden insigeln. Diser prief ist gegeben, do von christes gep/erd ergangen waren dreuczehen hundert jar, dar nach in dem ain vnd funfczigisten jar des nachsten vreitags nach sand Dorothe tag.

Source Fulltext: OÖUB 7 (Wien 1876) S. 228f., Nr. 226