Wir Albrecht von Gots gnaden hertzog ze Osterreich, ze Steyr vnd ze Chernden, vergehen vnd tuenn chunt offenlich mit disem brief allen, die in sehent oder horent lesen, daz wir gesehen haben die hantvest, die vnser lieber herre vnd vater chunig Albrecht seliger, do er hertzog was, den erbern vnd geistlichen leuten . . . dem brobst vnd dem conuent ze sand Florian geben hat, vnd als si des ouch brief habent von chaisern, von romischen chunigen vnd von vnsern voruordern den hertzogen von Osterreich also, daz si vberal in vnserm land fu^er alle zolle vnd mautt auf wazzer vnd auf land vrey vnd ledig sein schullen. Da von gebieten wir allen vnsern mauttern vnd amptleuten, die zu^e der czeit sind, den der brief getzaigt wird, ernstlich vnd wellen, daz si dieselben geistlichen leut vmb dhainen zol oder mautt weder auf wazzer noch auf land icht phrengen vnd dhain sovmung tuen. Wir gebieten ouch allen richtern vnd amptleuten vnd wellen ouch gar ernstlich, daz si demselben probst vnd dem conuent ir leut vnd ouch ir holden, die in zuegehornt vnd ir chost, der si zu irem hous bedurfen, vmb dhain gelt icht verbieten noch verbieten lazzen, man suech denn êe vmb diselben sache ein recht vor dem brobst oder vor seinen amptleuten. Wer aber, daz yeman gen demselben probst oder gen seinem gotshous icht ze sprechen hiet, wellen wir, daz man darvmb ir leut noch ir guet icht phreng oder aufhab, man suech denn êe darvmb ein recht vor irem vogt, den wir in ze richter geben haben. Swo aber daz vberuarn wurd von vnsern richtern, mauttern vnd amptleuten, an daz si sich in vnser vngnad veruallent, beleibent si vns ze pezzrung hundert phunt goldes nach ir alten hantuesten, die si von allen vnsern vordern habent. Vnd daz in daz furbaz also stêt beleib, als des obgenanten vnsers vatter brief sait, geben wir ze einer sicherhait disen brief besigelten mit vnserm jnsigel, der gebn ist ze Lintz an eritag vor sand Jacobs tag nach Christ geburd dreutzehen hundert jar, dar nach in drev vnd fumftzigsten jar.

Source Fulltext: OÖUB 7 (Wien 1876) S. 319, Nr. 312