ICH Joanns der Theurwanger vnnd mein hausfrau Margrethe vnnd all vnser erben die wier haben oder gewyngen, veriechen offenbar an disem brieff allen den, die jnn sechent oder hören lesen, die nun sündt vnnd hernach khunfftig werdten, das wier mit wollbedachtem muett mit gunst vnd mit rat aller vnser freundt vnd erben verkhaufft haben recht vnd redlich zu der zeitt, da wier es wollgethuen mechten, ain drittthaill aus dem mittern hoff gelegen auf des Wolffleinsberg vnd ain dritthaill auss der hofstatt, dye genanndt ist jnn der Chrin, das vnnser freis aigen gewesen ist, mit aller der vnnd dartzue gehört zu holtz zu veldt vnnd zu wismadt gebauen vnnd vngebauenn versuecht vnnd vnuersuecht wie es sey genanndt, mit allen nutzen vnd rechten, alss wier das haben jnnengehabt jnn nutz vnd gwer, dem erbarn mann Cunrathen dem Vetzinger zu Oberndorff, frauen Haedtwigenn seiner hausfrauen vnnd allen jeren erbenn, die sye haben oder noch gewynnen, vmb viertzigkh pfundt wienner pfening, der wier ganntz vnnd gar gericht vnnd gewert sein. Wier sollen auch vnnd wellen des drittthails ann dem vorgeschribnen hoff vnd auch an der hofstatt jer gewer sein zu hoff, zu daiding vnd an aller statt wo jnn des duerfft geschiecht, ohne aller geuär. wen aber der vorgeschriben Chunrat der Vetzinger, sein hausfrau frau Hädwig oder sein erben dhainenn schaden daran (nämen), den sollen wier jn ablegen vnd widerkhern vnd sollen sy das haben auf vns vnd auf aller vnnser hab, wo wier die haben in dem laut zu O^esterreich. wer aber jemant vnnder vnsern freundten oder nachkhomben, der pesser recht zu dem vorgeschriben aygen haben wollt, der geb dem offtgenanten Cunraten dem Vetzinger frauen Hadwig seiner hausfrauen oder seinen erbenn viertzig pfundt wienner pfening vnnd ziech sich dartzue. vnnd das die wandlung vnd der khauf also ebigclich stätt vnd vnuerkhert bleibe, darüber gib ich vorgenanter Janns der Teurwanger disen offen brieff versigellt mit meinem anhangundten jnnsigl vnnd mit des ehrwierdtigen herrn herrn Eberharts von Wallsee haubtman ob der Ennss vnnd vogt desselben aygens anhangundten jnnsigl, der daz durch dienstliches bitten daran hat gelegt, vnd zw ainem zeug mit Vllreichs des Vetzinger anhangundtem jnnsigl. Der brieff ist geben nach Cristy gebuert 1354isten jahre.

Source Fulltext: OÖUB 7 (Wien 1876) S. 393f., Nr. 382