ICH Geut die Welchinn des heilligenn geists orden zu Pulgarn veriech vnnd thuen khundt allen den, die den brieff sechent oder lesent oder ho^erent lesenn, die nun sündt vnnd hernach khunfftig werdten, das ich mit guettem willen zu der zeitt da ichs woll gethuen mecht, vnnd mit gunst meiner frauen frauen Elssbethn von Khranichberg zu der zeitt obriste maisterinn des hailligenn geists ordten zu Pulgarn vnnd mit des conuents güettlichen willen desselben ordens zu Pulgarn herrn vnnd frauenn gebenn hab nach meinem dott meiner muemen meines brueder dochter frau Ellen der Welchin desselben ordenns zu Pulgarn das guett auf dem Muesperg, das ich selbst khaufft hab vmb ain vnnd zwaintzig pfundt wienner pfening, das sy das soll jnnhaben vnnd nützen vnntzt ann jeren dott mit allen den rechtenn, die dartzue gehören vnnd ich es hab jnngehabt versuecht vnd vnuersuecht also, wann das gethan war, das die ehegenanndt Ellena die Welchin sturb, so soll das ehegenanndt guet auf dem Muesperg geuallenn auf Khunigundtenn die Holtzerinn vnd auf Anna von Närn desselben ordens zu Pulgarn vnd sollen sy das jnnehaben vnd nutzen vntzt ann jer baider dott ann allen khrieg vnd an alle jrrung. das die red stätt vnnd vnuerkhert bleibe, darüber gib ich vorgenante Geut die Welchin jnn disen brieff versigellt mit meiner ehegenanten frauen frauen Elssbethn von Khranichberg anhangundten jnnsigll vnnd mit des ehegenannten conuents zu Pulgarn anhangundten jnnsigell, die der voruerschribnen sach getzeug sündt, wan ich selber aygen jnnsigll nicht gehabt hab. Der brieff ist geben nach Cristy gebuert jm 1354isten (sic! im Vidimus) jahr ann vnnser frauen tag der diennstzeitt.

Source Fulltext: OÖUB 7 (Wien 1876) S. 375, Nr. 364