Ich Vlreich von Lonstorf, mein hausfraw Ann vnd all vnser erben vergechen vnd tu^en chund allen den di den brief sechent horent oder lesent, daz wier mit wolbedachten mu^et recht vnd redleich gesatzt haben Jansen von Aerndorf seiner hausfrawn Torothe vnd allen iern erben vnserev drev tail di wier haben an dem hof ze Lughaim, der gelegen ist auf der Jpphe in Florianer pharr, mit sampt der hofwis vnd der hofstat vnd mit allen den rechten vnd nutzen vnd angua^erd dar zu^e geho/rrt ze holtz vnd ze veld versu^echt vnd vnuersu^echt, vmb sybentzk phunt wienner phenning der wier gewer sein, darvmb wier sev aller ia^erchleich ledigen vnd losen schullen ze sand Jo^erigen tag acht tag vo^er vnd acht tag hinnach. Wier sein auch des vorgenanten sacz auf dem egenanten gu^et ier gewer, wo in des no^et geschiecht, als lancz recht ist. Wa^er aber daz in darvber dhain chrieg davon auf stu^ent von wem daz gescha^ech, den schullen wier in gancz vnd gar ausrichten vnd richtig machen an all ier mu^e vnd auch an allen iren schaden. Taet wier des nicht, swittann schaden si des dann dar vber nement, den schullen wier in gantz vnd gar ablegen vnd widerchern, vnd schullen si daz haben auf vnsern trewen vnd dar zu^e auf aller vnser hab, swo wier di haben versu^echt vnd vnuersu^echt. Daz di red sta^et vnd vntzebrochen beleib, darvber geben wier in den brief gesigelten mit vnserm anhangundem insigel, und mit des ersamen herren hern Eberhartz von Waltse zden zeiten hauptman ob der Ens anhangundem insigel, der daz an hat gelegt durch vnser pet willen zu^e einer zevgnuzz iem an schaden. Der brief ist geben nach Christes gepu^erd drevtzechen hundert jar vnd in dem sechs vnd fumftzkistem jar an sand Mathias abent.

Source Fulltext: OÖUB 7 (Wien 1876) S. 437f., Nr. 431