Go^etfridus Dei gracia Patauiensis episcopus venerabilibus et religiosis viris preposito et conuentui canonicorum regularium monasterii sancti Floriani ordinis sancti Augustinni nostre diocesis salutem et sinceram in domino caritatem. Virtutum exercicia et laudabilium operum merita que cum prompte hospitalitas beniuolencia in vestra vigent ecclesia, sumptuosa quoque et sollempnia que in decorem domus domini ibidem fiunt edificia, digne promerentur vt ad graciam vobis faciendam reddamur liberales. Pro comodiori igitur onerum vestrorum supportacione deuocioni vestre concedimus et ex speciali gracia quemadmodum eciam a nonnullis predecessoribus nostris pristinis temporibus graciose vobis indultum esse comperimus omni iure modo et forma quibus melius et efficacius possumus indulgemus, vt in omnibus et singulis beneficiis ad collacionem vel presentacionem vestras spectantibus in nostra diocesi constitutis, illis duntaxat exceptis de quibus veris pastoribus in absencia nichil solui consueuit cum primum ea vacare contigerit, fructus et obuenciones medios primi anni vacationis eorundem licite recipere et vtilitatibus monasterii vestri applicare valeatis, prouiso tamen quod a nullo beneficio amplius quam se nostra presens extendit liberalis donacio emolimenta huiusmodi recipiatis, quodque ex presenti donacione nostra nullum ius perpetuum ea recipiendi vobis deinceps vsurpetis, et quod beneficia predicta pro tempore infrascripto debitis obsequiis et consuetis ministris minime defraudentur, presentibus ad triennium tantummodo duraturis. In quorum testimonium presentes vobis tradimus literas nostri ac venerabilis capituli nostri sigillorum munimine roboratas. Datum Patauie Othmari abbatis anno domini millesimo trecentesimo quiaquagesimo nono.

Source Fulltext: OÖUB 7 (Wien 1876) S. 671, Nr. 660