Wir Ru^odolf der vierd von Gots genaden ertzherzog ze Osterreich ze Steyr vnd ze Kernden fu^erst ze Swaben vnd ze Elsazze herre ze Krayn vf der Marich vnd ze Porttenaw vnd des heiligen romischen reiches obrister jegermaister bechennen vnd tu^on kunt, daz wir haben angesehen geistlich zucht und go^etleich leben der erbern lewt vnserr lieben andeetigen probst Weigandes von sand Florian vnd der chorherren daselbs, vnd haben in dadurch vnd darumb daz si dester vleizzichlicher aller vnserr vordern in irm gepet gedenken vnd vmb vnser vnserr lieben hertzoginne vnserr bru^eder vnd vnser erben seld vnd hail dest entzichleicher hintz Got bitten, die genad getan vnd tun auch mit disem brief, swenne si vnd ir gotshaus ain haus in der stat ze Ens chouffent oder gewinnent, daz denne si vnd ir nachkomen ewiklich darinne frey vnd ledig sein vor aller purgerstewr schatzstewr vngelt wachte vnd aller anderr voderunge vnd ansuchunge wie die genant ist also, daz si von dem egenanten haus das si chouffent oder gewinnent nichts nicht leiden sullen mit der stat vnd mit den purgern ze Ens weder von der stat wegen noch von ir selbs wegen. Vnd wer ir wirt darinne ist, den sullen weder die purger noch iemant ander vmb derselben chorherren geschefft wider die vorgenanten freyunge nicht besweren ane geuerde. Hiet aber derselb wirt von sein selbes wegen dhain aribait oder wandel, davon sol er mit der stat leiden als dann pillich vnd recht ist nach der vorgenanten vnserr stat recht. Vnd daru^eber ze vrkunde vnd ewiger gedechtnusse geben wir in disen brief versigelten mit vnserm grozzem anhangundem insigel, der geben ist daselbs ze Ens an sand Lorentzen tage nach Kristes geburt tausend drewhundert jar darnach in dem sechtzigistem iare vnsers alters in dem ains vnd zwaintzigistem vnd vnsers gewaltes in dem dritten jare.||
+ Wir der vorgenant herzog Ruodolf sterken disen prief mit dirr vnderschrift vnser selbs hant. +

Source Fulltext: OÖUB 7 (Wien 1876) S. 708f., Nr. 705