Wir Ru^odolff der vierd von Gots genaden ertzhertzog ze O^esterreich ze Steyr und ze Kernden herre ze Chrain auf der Marich und ze Porttenowe graf ze Habspurg ze Phirtt und ze Kyburg, marichgraf ze Burgowe und lantgraf in Elsazze bechennen, das die erbern Ulreich der Veyrtager ze sand Po^elten und Weigant ze sand Florian probst fur u^ens cho^emen sind mit ieren conventen und chlagten grozzen gepresten und schaden den sev hieten und nemen an iern weintzehenden, den sev und ier baider go^etsha^euser habent in der Wachawe von dem Wattstain in die Mustnikch in sand Michels pharr und in dem Mulbach von Elsaren untz gen Zeunikch in Reinacher pharr do sev auch gestifft sind, das ettleich datrinn wern die in dbainen zehent geben noch geben wolden; ettleich geben in auch zehende nicht gentzlich noch rechtichleichen und mit geverde. So verfu^erten in auch ettleich die zehende wider ier wizzen und u^eber ier willen und paten u^ens mit gantzer begierde, das wir ir und iern go^etsha^eusern die gepresten geru^echten ze wenden und sie darinn besargten mit u^ensern gnaden, und prachten auch fur u^ens ir urchunde die sev uber dieselben zehende heten von pa^ebsten von bischoffen von u^ensern vorvadern und auch von den von Chunringen die der Wachawe etteswenne gewaltig sind gewesen, und paten u^ens begierdlich durch Got, das wir in unserr vorvodern brieff geru^echten ze vernewen; das tet wier als wir ze recht solden und gaben in u^enser brief, das in aller ier zehende an geverde von phaffen und von layen von christen und juden solt werden geraicht gantz und gar als ier brief und ier bestetigung daru^eber sagent. Nu chamen sew darnach aber fur uns mit gueter chuntschafft und chlagten u^ens, wie sev aller ierer brief noch unserr gnaden di wir in und iern go^etsha^eusern getan haben mit der bestetigung nichts mo^echten geniezzen das man in ier zehende rechtlichen wolde raichen, und chlagten auch u^ens vil unpilleicher chrieg dev sev menigerev jar heten getragen und besargten, das ier gotshawser mit den chriegen also mo^echten verderben und sagten u/ans, das si sich des veraint hieten das sev u^ens unsern pru^edern unsern erben und unsern nachchomen jerlichen den zehenden tail weins willichleichen geben wolden aus iern chelern ze vogtrecht ze unser veste ze Tyrnstain aus allen iern zehenden dev sev habent in den obgeschriben gemerkchten also, das derselbig tail iers zehends ze einer gedechtnu^ezz der vogtey ewichleichen bey derselben veste ze Tyrnstain beleiben solt darumb, das sev und ier nacbcbomen fu^erbas entladen wu^erden aller chrieg und autlauf die seu manigveltichlich lange zeit habent gehabt u^entz auf disen hewtigen tag als der brief geben ist, und paten uns durch Got, das wier das vogtrecht von im nemmen und das wir unser pru^eder unser erben und u^enser nachchomen ier helffer und verantwu^ertter wern gegen allen law^eten es wern phaffen oder layen also, das ier go^etsha^euser von dirr chrieg wegen also icht verdurben und sev doch bei rechten mechten beleiben. Nu haben wier fur u^ens geladen juristen und geistlich rechtmaister, di uns bey lern trewn des beweist habent daz die obgenanten zwai go^etsha^euser nach ierr briet sag in den obgeschrieben gemerkchten rechtlichen den zehent habent ze nemmen von allen la^ewten, und darumb haben wier angesehen Got und di rechtigchait, das ein igleich christenmensch gepunden ist ze geben seinen zehende gentzlich und ungeverdlich, das auch di go^etshauser und die phaffhait die Got darinn dienent darauf gestifft sind, das seu der leben su^ellen und sich ier convent und ier gesind damit bewaren und ier gastung und almu^esen davon tragen und raichen su^ellen. Davon mainen wir nach gu^etem rat unserr lantherren den vorgenannten go^etsha^eusern stund Po^elten und sand Florian ier gepresten ze wenden und verpinden u^ens, das wier u^enser pru^eder u^enser erben und u^enser nachcho^emen der vorgenanten go^etsha^euser helffer und scherm und veranttwurtter gentzlich sein wellnn und sollen gegen geistlichen und werltlichen gericht vor allem gewalt und unrecht. Und davon so gepieten wier von erst gar ernstlichen bey unsern hulden und gnaden allen u^ensern amptlau^eten die verbeser sind u^enserr weingarten in den obgenanten gemerkchten, daz sev rechten zehent raichen und geben von allen weinga^erten die wir unser pruder u^enser erben und nachchomen haben oder gebinnen daselbs gantz und gar an alles geverde. Darzu gepieten wier ernstlich und wellen auch vestichleich, das alle die in der vorgeschriben Wachawe und Mulbach in den obgenanten gemerchten weingarten habent es sein bisschoff abpt prelet oder ander gotsha^euser phaffen geistlich oder werltlich edel oder unedel christen oder juden, das sev von denselben weinga^erten zehende raichen und geben jerlichen gentzlich und rechtichleichen an alles geverde als sev durch recht sullen und gepunden sind den obgenanten go^etsha^eusern ze sand Po^elten und ze sand Florian und auch iern amptla^euten und u^ens und u^ensern ampt¬la^euten, und su^ellen den raichen und wern in emmern hemen und vazzen bei den prezzen. Wer aber das yemant den zehende nicht rechtlichen geb, so sol u^enser anwalt wen die go^etsha^euser darzu vadern von u^ensern wegen oder ier amptla^eut gen in aller la^ewt chelrr und da beshawen, ob in rechtlich sei der zehende gevallen, und was in des zehends aus lig das su^ellen sev ervollen gentzlich aus den vazzen, und ob yemant des wider wer es sein bisschoff abpt prelet oder andrew gotshauser phaffen oder layen edel oder unedel christen oder juden di ier chelrr und ier gemach nicht auf wolden sliezzen oder sich widersatzten das si iern zehende nicht rechtlichen wolden raichen, dev sol u^enser purgraf ze Tyrnstain oder unser anwalde darzu^e no^etten und in aufsto^ezzen ier chelrr und ier gema^ech und den rechten zehende daraus mit gewalt nemmen und diselben pezzern vestichleichen nach iern schulden mit grozzen wandeln ze u^ensern handen. Wer aber yemant der fu^ergeb und sprech das er nicht zehende geben solde von seinem weingarten, der pring darumb sein u^erchund fu^er u^ens, und wes er rechtlichen geniezzen sull daz geschech. Auch gepieten wier daz niemant maisch most noch wein aus dem tal der Wachawe noch dem Mulbach noch aus den obgenanten gemerkchten fu^ern sol weder auf wazzer noch auf lande noch u^eber Tunawe er hab sev dann emaln vertzehent und er hab auch unsrev rechtev wartzaichen di wier und auch ier gotsha^euser mitsampt u^ens fu^erbas jerlichen daru^eber geben werden; welich daru^eber den zehende an willen und an rechtev wartzaichen verfu^ernt oder sich wider u^enser gepot widersetzent, wie di genant sind, die sullen den unvertzehenden wein gentzlich haben verlorn wo man den vindet in u^ensern landen, und von denselben weynen sol man den zehende voraus nemmen und der u^ebrig tail sol ze u^ensern banden gevallen. Und wu^erd man auch des gewar hinnach, das yemant seinen zehende haimleich behalden oder verfu^ert hiet, denselben sol der obgenanten zwaier gotshauser anwalt mit hilff des purgrafen ze Tyrnstain und unsers richter in der Wachawe no^etten mit der hawen und aribait in den weingarten umb den zehende und umb die wandel darumb, das sev den zehende wider u^enser gepot und wider das recht freveleichen und unpilleich habent behalten. Auch verpinden wier u^ens fu^er u^ens selb fu^er u^enser pru^eder u^enser erben und fu^er u^enser nachcho^emen, ob wier di egenanten gotshauser nicht getrewlich verantwurtten und beschierm in allen wegen als wier u^ens vor verpunden haben, so su^ellen wier zehant vervallen sein in den zorn und ungenad des almechtigen Go^ets, den wier u^enser pru^eder unser erben und all unser nachcho^emen darumb pilleich fu^erchten und besargen sullen, dazu^e welhen schaden sev und ierev go^etsha^euser unrechtlichen nemen von verreidung (sic) u^ensers schierms den sev geweisen mu^egen mit chuntschafft, derselb schaden sol u^ens u^ensern pru^edern u^ensern erben und unsern nachcho^emen abgen an u^enserm vogtrecht desselben weintzehends gantz und gar den sev an all beswerung mit u^enser gunst sullen behalten. Wer aber die wern u^enser selbs u^enser pru^eder u^enser erben und nachcho^emen amptlaut diener oder wen wier darzu schaffen von u^ensern wegen die dev vorgenanten gotsha^ewser nicht getrewlich beschiermten vor allem gewalt und unrechten an iern zehenden und auch an unserm vogtrecht nach u^enser brief sag die sev von uns habent, die sullen vervallen sein an all genad hundert phunt golts, di halb gevall (sic) sullen in u^enser chamer und halb iern gotshausern, und sullen auch ier baide go^etsha^euser und die pharr ze sand Michel in der Wachawe bey iern alten rechten und gewonhaiten beleiben also, daz sew uns von iern pawbeingarten di sev und iere go^etshauser habent und gebinnent dhain vogtrecht nicht raichen noch geben su^ellen. Diser sach sind getzeug der erbirdig herr Johanns bisschoff ze Gurk u^enser lieber chanzler und di erbern und geistlichen abpt Johanns von Melkch abpt Clemens von den Schotten ze Wienn probst Ortolff von Neunburkch und die edeln graf Meinhart von Go^ertz unser lieber ohem und graf Ulreich von Cyli ze den zeiten u^enser hauptman in Chrain und unser lieben getreuen Eberhart von Walsse von Lintz Stephan von Meyssawe obrister marschalich Alber von Puchaim obrister druchsetz Haidenreich von Meissawe obrister schenkch Peter von Ebersdorf obrister chamrer Leutolt von Stadek unser lantmarschalich in O^esterreich Eberhart von Walsse von Gra^etz Fridreich von Aufenstain obrister marschalich in Kernden und ze den zeiten hauptman daselbs Hainreich von Rappach u^enser hofmaister Jans von Lasperg u^enser chamermaister Hainreich der Prenner (sic) u^enser chuchenmaister Eberhart der Chastner u^enser schenkch und Wilhalm der schenkch von Liebenberg unser speismaister und anderr erberr law^et genu^eg. Und des ze u^erchund geben wier den brief besigelten mit u^enserm gro^ezzem furstlichem insigel, der geben ist ze Wyenn am phintztag vor sand Kathrein tag nach Christes gepu^erd drewtzehen hundert jar darnach in dem zway und sechtzigistem jar unsers alters in dem vyer und zwaintzigistem und u^ensers gewalts in dem fumften jar.||
+ Wir der vorgenant herzog Ruodolf sterk disen prief mit dirr underschrift unser selbs hant. + ||
Et nos Johannes Dei gratia||
Gurcensis episcopus prefati||
domini nostri ducis primus||
cancellarius recognovimus||
prenotata.

Source Fulltext: OÖUB 8 (Wien 1883) S. 104ff., Nr. 102