Wir Weygant von Gotes erparmung probst ze sand Florian Fridreich der techent und der convent gemanigklich daselbs in Passawer pistum vergehen und tun chund offenlich mit disem prief fu^er uns und all unser nachchomen ewichlich, warm uns der durchleichtig fu^erst unser genediger lieber herr hertzog Ru^edolf ze O^esterreich ze Steyr ze Ka^ernden etc. auf unserm weinzehennt in der Bachaw gelegen und auf alle andrew gueter genedichlich gu^enstlich getra^ewlich und sunderlich schiermen und fristen wil vor allem gewalt und unrecht als dy hantvest sagt dy wir sunderlich umb den egenanten weinzehent von im darumb haben, dunchet uns pillich und zimet wol, das wir das mit etlicher danchwerehait erchennen, und davon hab wir uns unser gottzhaws und unser nachchomen dazu verpunden, und verpinden auch wissenlich mit disem prief, das wir umb hail und gelu^ekch dez obgenanten unsers herren herzog Ruedolfs all jar an aller heyling abenten dy weil er lebt in unsern kloster singen und lesen sullen das ampt und dy mezz dy man singet um hail der lebentigen. Aber wann er nicht mer ist das got lang wend, so sullen wir auf den tag seins todes im seinen vodern und nachcho^emen ainen ewigen jartag begen mit vigilgen messen und mit anndern gottesdinsten und scho^enhait als wir unserm rechten stiffter pillich tun sullen, und wann der selb unser herr herzog Ruedolf uns vil annder fu^eedrung und genaden erzaiget hat und noch ta^eglich von seiner guetigkait erzaigt, hab wir zu ainem warzaichen rechter derchantnuss verhaissen und gelobt verhaissen und geloben auch pey unserm orden und in gueten trewn fu^er uns und unser nachchomen, das wir jerleich dreyer tag vor unser frawentag der liechtmess dem probst und dem capitel dy derselb unser herr der hertzog in sand Steffans kirchen zu Wyenn stifften wil senden und dienen su^ellen auf unser aigne chost und zerung viertzig phunt wachs, daraus man machen schol chertzen, die dy egenanten der probst und das capitel zu der scho^enhait der selben hochtzeit unser frawn zu lob und zu eren tragen sullen. Und alle dy weil daselbs zu sand Steffan zu Wyenn der tu^om nicht aufgericht und gemacht ist, schu^ellen wir dasselbig wachs raichen und geben auf den obgenanten tag dem pfarrer und den chorpriestern hintz sand Stefan zu Wienn an alle widerred, und des zu urkund und warer getzeugnu^ess geben wir fu^er uns und all unser nachko^emen ewichlich unsern prief versigiltn mit unserm insigil, der geben ist zu sannd Florian an sannd Nichlas tag nach Christes gepurd drewtzehen hundert jar darnach in dem zbai und sechtzigisten jar.

Source Fulltext: OÖUB 8 (Wien 1883) S. 110f., Nr. 106