Wier Weygand von Gots genaden brobst dacz sand Florian, ich Nicla techent und der gancz convent doselbs wir vergehen, . . . daz wir angesehen haben di andacht und di begir di der erber man Chunrat der Flander von Wesendorf und sein hausfrow vrow Sweigmut habent ze unserm herren durch hails willen irr sel. und haben uns verpunden mit unsern trewn ze sprechen ain ewigew mezz an ainem tag in der wochen an dem ertag von unsrer chirchen von sand Michel dacz Wesendorf in unserr chappellen, wer aber daz der pharrer von sand Michel di mezz an dem selben tag vor ehafter no^et nicht mo^echt gesprechen, so sol er di selben mezz erstatten in der selben wochen. Geschaech des nicht, so sol der pharrer von sand Michel dem zechmaister von sand Michel raichen zwelif phenning, und derselben phenning sol der zechmaister sechs geben ze dem liecht in di obgenanten chappellen dacz Wesendorf und di sechs sol er raichen armen lewten. Und umb denselben gotsdinst habent uns der vorgenant Chunrat der Flander und sein hausfrow geben ainen paumgarten gelegen dacz sand Michel auf des pistum grunt von Pazzaw und dyenet dem pistu^om drey phenning ze pu^erchrecht und dyenet auch sybenczik phenning geng Malhensto^erf an sand Michelstag, wer aber daz der paumgarten von gots gewalts wegen ab naem und den obgenanten gotsdinst nicht mo^echt getragen, so sol sich sein der zechmaisler von sand Michel underwinden und dem pharrer von sand Michel all jar raichen von dem selben paumgarten ain phunt phenning ze ainem jartag dem offtgenanten Chunraten dem Flander seiner hausfrawn und ir paider vorvodern und nachchomen, den man in begen sol mit ainer vigili und mit einer selmezz an der aindlef tawsent mayd tag. wu^erd aber uber daz phunt phenning icht uber, daz sol man raichen armen lewten so is verrist mag gelangen. Daz di wandlung also staet und unverchert beleib daruber geben wir in den offen prief versigelten mit unserm und unsers convents anhangundem insigeln. Der prief ist geben nach Christes gepu^erd drewczehen hundert jar darnach in dem funf und sechczikisten jar an aller heyling tag.

Source Fulltext: OÖUB 8 (Wien 1883) S. 250f., Nr. 249