Ich Winther der Durner ich Kathrei sein hausfraw und alle unser erben verjehen, daz wir mit gunst meins swagers Larentzen Ruegers dez sneyder sun von Ens ze chauffen haben geben unser gut genant an der Stigel gelegen in der pfarr ze Ansveld, daz lehen ist von den erbern Herren von Chappellen und von den von Chunring dem erbern mann Nyclan dem Furholtzer gesezzen an dem Aygen in der egenanten pfarr vrawn Margreten seiner hausfrawn und allen sein erben umb ein gelt, dez wir gantz und gar gericht und gewert sein zu rechten tegen. Daz im di red von uns also stet und unzebrochen beleib, dar uber so gib ich obgenanter Winther der Durner in den offen brief versigelten mit meinem anhangunden insigel wolbestetigt und mit meins lieben swagers Larentzen Rueger dez Sneyder sun von Ens und dez erbern mannes Ulreichs des Uetzinger zder zeit gesezzen ze Lincz payder anhangunden insiglen. Geben da man zalt von Christi geburd dreutzehenhundert jar und in dem fumf und sechcziksten jar an sant Thomans tag.

Source Fulltext: OÖUB 8 (Wien 1883) S. 256, Nr. 256