Ich Chalhach von Zirknarn und Anna mein hausfrow wir vergehen, daz wir von unserm genedigen herren probst Weyganden und dem gotshows dacz sand Florian ze lehen haben ze zins umb zehen phenning di zehenthow^eser di hernach geschriben stent. Dacz Marchbach ainen hof mit allem und darzw geho^ert, dacz Zirknar ain hofstat ze drin velden daz wir pawn in unser gesaezz, und dacz Choezleinstorf ain wis ze drin tagwerchen, wir su^ellen auch di vo^ergenanten zehen zinsphenning raichen und geben dem egenanten brobst und dem gotshows dacz sand Florian all jar jerlich an unser vrawn tag zder dinstzeit an alles verziechen. wer aber daz, daz wir di obgenanten zehen phenning zdem vorgenanten tag nicht gaeben, gestet iz also vierczehen tag, so sey wir vervallen sechczik phenning ze wandel. Geben wir derselben phenning houbtguts und wandels aber hinnach in vierczehen tagen nicht, so sey wir aber vervallen sechczik phenning ze wandel. Gestet iz also nach dem obgenanten unser vrawn tag drey viertzehen tag, so ist des wandels sechs schilling phenning, richten wir aber daz wandel und daz houbtgut inner jars vrist nicht, so sein wir gevallen von allen den rechten di wir haben an den obgenanten guetern. Wer auch daz daz yemant furbaz elter prief her fu^er praecht umb di obgenanten gueter, di sullen tod und ab sein und furbaz nyemant ze schaden cho^emen. Und daz di red und di wandlung also staet und unczebrochen beleib, daruber gib ich vorgenanter Chalhach von Zirknarn dem obgenanten meinem genedigen herren dem brobst dacz sand Florian und auch dem gotshows doselbs den offen prief fur mich und fur all mein erben versigelten mit meinem anhangundem insigel, und ze einer pessern sicherhait mit Walchuns von Neunhouen und Seybots des Sweinpekchen anhangunden insigeln. Der prief ist geben nach Christes geburd drewczehen hundert jar darnach in dem sechs und sechczikisten jar an sand Jorgen tag.

Source Fulltext: OÖUB 8 (Wien 1883) S. 275f., Nr. 279