Wir Agnes von Gots genaden abtessinn des gotshows datz Erlachlo^ester bechennen offenlich mit dem prief und tun chunt, do der ersam geistlich herr brobst Weygand von sand Florian von unserm genedigen herren bischof Albrechten von Pazzawe geschafft und gesantt ward ze uns in unser gotshow^es ze verhörn und ze berichten all di stözz und zu^espru^ech di wir und unsers gotshows frawn geng einander hetten ze sprechen und ze mellden, daz er darnach und er unser raitung gar und gentzlich aufnam und auch allew zu^espru^ech und antwu^errtt di sich zwischen uns vergiengen gemerchat, daz wir do umb diselben sto^ezz und zu^espru^ech und auch umb allew andrew^e handlung di sich zwischen uns und der frawen heten vergangen untz auf diselben zeit, gentzlich und gar und an alles geverd gegangen sein mit unserm gu^etlichem willen hinder di ersamen geistlichen herren abt Niclan von Gersten und den obgenanten brobst Weyganden datz sand Florian also, waz si zwischen uns spraechen oder erfunden, daz sollten und wolden wir staet hallten und do solt iz auch staetlich pey beleyben. Und da habent diselben obgenanten ersamen herren gesprochen zwischen uns, daz allew di sto^ezz zu^espru^ech und invall und auch allew andrew handlung do von chrieg oder schaden mücht cho^emen di sich zwischen uns untz auf disew^e zeit habent vergangen ganz und gar bericht und ab sein su^ellen, und su^ellen wir derselben fürbas in dhainen geverd oder schaden nicht gedenchen weder haimlich noch offenlich in dhainen wegen, wer aber daz daz wir daz indert unpillich überfu^ern wie sich daz fuegt daz man rechtlich hintz uns mo^echt geweysen, so su^ellen wir in unsers genedigen herren bischof Albrechts von Pazzaw ungenad sein vervallen und sein pessrung darumb leiden nach seinen genaden. Und pey der handlung ist auch gewesen ain offner schreiber der di sache und di handlung hat verschriben gentzlieh under seinem gewendlichen zaichen. Und daz versprechen und verhaizzen wir alles staet ze hallten mit unsern trewn. Und zw ainer pessern gedaechtnu^ezz geben wir den offen prief versigelten mit unserm anhangunden insigel, der geben ist nach Christes geburd drewtzehen hundert jar darnach in dem syben und sechtzikisten jar an unser frawen tag zder lichtmesse.

Source Fulltext: OÖUB 8 (Wien 1883) S. 309f., Nr. 314