Ich Ott von Ernvels und ich Heinrich von Ernvels wier paid pru^eder und all unser erben wir vergehen, daz wir verchaufft und gegeben haben dem ersamen geistleichen herren brobst Weyganden und dem convent datz sand Florian unserm (sic) hof datz Lughaim und di hoffstat doselbs und das wismad und das holtz das wir doselbs besunder ungedientes gehabt haben und das unser recht vreiz aygen gewesen ist ledichlich an allew^e erbvogtey und ist gelegen in Florianer pharr, umb hundert und achtzik phunt phenning wienner mu^enss der wir gantz und gar von in ze rechten taegen gericht und gewert sein. Wir haben auch in das obgenant guet alles geben aus unsrer nutz und gewer in ir nutz und gewer mit allen den nu^etzen ern und rechten und darzu^e geho^erent. Ich obgenanter Ott von Ernvels und mein pru^eder Heinreich und all unser erben su^ellen und wellen des egenanten hofs datz Lughaim und der hofstat doselbs und alles des das dar zu^e geho^ert als das obgeschriben ist des egenanten brobst und des convents datz sand Florian recht scherm und gewer sein fu^er all ansprach. Wer aber daz daz in do von icht chriegs aufstu^end, den su^ellen wir in ausrichten an allen ierm schaden. Taeten wir des nicht wie getanen schaden si des naemen den der offtgenant brobst oder des convents ainer pey seiner gewizzen gesprechen mu^echt, denselben schaden mit sampt dem hautptgu^et su^ellen wir in gentzlich abtu^en und widerchern und su^ellen si das haben datz uns datz unsern trewn unverschaidenlich und dar zu^e auf aller unsrer hab di wir haben oder noch gewinnen wo di gelegen ist oder wi di genant ist, und sol man in di ingeantwu^erten mit unserm gu^etlichem willen, der hertzog in O^esterreich oder wer seinen gewalt hat oder in welcher gepiet ez leit wir sein lebentig oder to^ed. Daz in der chauf und di handlung von uns fu^erbas also staet und unverchert beleib, daru^eber geben wir obgenant Ott und Heinreich paid pru^eder von Ernvels in den offen prief ze ainem warn ewigen u^erchu^end versigelten mit unser paider anhangunden insigeln, und ze ainer pezzern sicherhait mit unsers genedigen herren graf Ulreichs von Schawenberch und unserer lieben o^eheim Jo^ergen von Volchensto^erf, und Hertneits von Losenstain und mit des eibern ritter hern Philipps des Po^enhalm anhangunden insigeln. Geben nach Christes gepu^erd drewtzehen hundert jar darnach in dem sibentzikisten jar an sand Michelstag.

Source Fulltext: OÖUB 8 (Wien 1883) S. 488f., Nr. 493