Ich Albrecht der Stadler vergich offenleich mit dem prief, daz mier der erber gaistleich herr probst Weygand datz sand Florian verlichen hat alain ze meinen tegen und nicht lenger den hof datz Höflein und die seld darzu^e und di mu^el under dem Wartperg, daz alz gelegen ist in der pharr ze Wartperg und geho^ert zu^e dem gotshaus hinz sand Florian also beschaidenleich, daz ich ez pa^ewleich und stiftleich legen schol und inn haben, und wen ich darauf setz dem han ich daz recht ze geben als ander holden habent auf iern gu^etern des gotshaus von sand Florian. Man schol auch alle jar von den egenanten gu^etern dem probst dienen von dem hof dreizzik von der mu^el drei schilling gebiger wienner pfenning an unser vrawen tag zder dienstzeit. Und wan ich abgen mit dem to^ed, so ist der hof seld und mu^el gentzleich ledig wo^erden dem gotshaus datz sand Florian wie ez den leit und erfunden wiert, und wer denn di gu^eter inn hat der schol sew besten von dem probst und schol mein hausfraw noch erben oder frewnt dhain ansprach noch rechtz zu^e den gu^etern haben oder gehen, daz lub ich allez stet zehalden pey meinen trewn an alz gever. Wu^erd aber daruber des icht ubervaren daz vor verschriben ist, so pin ich gevallen von meinem recht daz ich gehabt han an den gu^etern also, daz sich ier der probst underwinden mag und seinen frum damit schaffen wie er wil und schol mein gu^et will sein. Daz di wandlung also stet beleib daruber gib ich den prief versigelten mit meinem und meiner pru^eder anhangunden insigeln Eberharts und Reimbarts di mit mier verhaizzent, und ze pezzer sicherhait han ich gepeten hern Sigharten den Gru^eber und Fridreichen den Holzer daz si der sach zeug sind mit iern anhangunden insigeln in an schaden. Der prief ist geben nach Christi gepu^erd u^eber drewzehen hundert jar darnach in dem zwai und sibetzkisten jar an sand Ulreichs tag.

Source Fulltext: OÖUB 8 (Wien 1883) S. 599f., Nr. 597