ICH Eberhardt vonn Capelln die zeit haubtman zu Enns Herrn Hannsen sohnn von Capellen dem Gott genadt unnd ich Eberhardt von Capelln der junger herrnn Ulreichs sohnn von Capelln dem auch Gott genadt wier verjechen füer unnss unnd all unnser erbenn unnd nachkhomben, dass wier geben habenn den erbern geistlichen frauen unnd herrnn unnd allen ieren nachkomben zu dem khloster unnd dem gottshaus zu Pulgarn die guetter die hernach stehn und lechn von mier (?) gewesen sein, von erst das guett im Stainach unnd das guett im Leinech das guett auf dem Püchell das guett auf dem Graben unnd das guett zu Perlein auf der Strass die alle gelegenn seint in Gallneukhürcher pfarr, also das sy ieren frumben damit schaffen mügen recht alss mit andern ieren güettern, unnd darum haben sye unnss zu ainem rechtenn widerwechsel gegeben unnd ledig lassen das ain fueder weins das sy ehemallen alle jahr järlichen genumben haben zu Strass in unserer herrschafft zu Valckhenberg auss unnserm zechent das in unsere vorvodern gebenn habenn zu dem ehegenanndten gottshauss zu Pulgarn unnd inn dartzue ier uhrkhundt darüber gegeben hettenn. darumben aussern wier unnss der lechenschafft der egenanten güetter unnd gebens innen zu ainem rechten freyen aygen. wär aber das inn ann den ehegenandten güettern icht abgieng mit recht, das sollen wier innen aussrichten nach dem lannts recht zu Osterreich unnd sollen auch sy noch khain ierer nachkhoinben khainen zuespruch nach dem ehegenandtenn fueder weins nymber mehr habenn noch gewynnen, unnd was sy füer brieff hetten uber das obgenanndt fueder weins, die sollenn all dott unnd ab sein unnd khaynn crafft nicht mehr habenn umb das vorgenant fueder weinz nicht, undt sonst sollen sie umb all sachen bey ihrer kraft beleiben ohn allein umb das obgenandt fueder weins nicht, unnd des zu uhrkhundt gebenn wier obgenanndt von Cappelln füer unns unnd all unnser erbenn unnd nachkhomben innen den brieff versigellten mit unnsern anhangundten innsigll, und des sündt getzeugen unnser dienner Harnollt der Reutter die zeitt lanndtrichter unnderhalb der Enns unnd Hertneidt der Schickh. Geben ann freytag vor sannt Veyts tag nach Cristus gebuert dreytzechen hundert jahr unnd in dem zway unnd sybentzigisten jahren.

Source Fulltext: OÖUB 8 (Wien 1883) S. 594f., Nr. 592