Ich Ru^odolf Chnebl ze Wachaw^e pey der Tünaw vnd all mein Erben vergechen vnd tün chvnd offenlich mit dem bri^ef allen den di^e in sechent . lesent, oder ho^ernt lesen, daz wir mit vnserr erben güten willen vnd günst, mit wol bedachtem mu^et, vnd nach Rat vnserr pesten Vrew^ent zu der zeit . da wi^er ez mit Recht wol getu^en mochten Recht vnd redleich verchauft haben vnsern ledigen Weingarten genant der Rigl gelegen in Chunratstal, da man, alle Jar von dint, dem Pharrer dacz sand Michel in der Wachaw^e fvmf wienner Phenning, an sand Michelstag zu rechtem Pürchrecht, vnd nicht mer, Den vorgenanten Weingarten mit alle den ern, Rechten vnd nücz, die darzü gehörent, als wir in vnuersprochenlich . in Pürchrechts gewer her pracht haben, Also haben wir in verchaufft, vnd geben, vmb acht vnd zwainczik phunt wienner phenning, der wi^er gancz vnd gar verricht vnd bezalt sein zu rechten taegen, dem Erbern Jansen Merten svn von Senftenwerch, vrawn Elspeten seiner Hausfrawn vnd allen seinen Erben fu^erbaz ledichleich vnd freylich ze haben vnd allen i^ern frumen da mit schaffen, mit verchauffen verseczen, vnd Schaffen, machen vnd geben, wem sy wellent, an allen irrsal. Wir sein auch des vorgenanten Weingarten i^er recht Scherm vnd gewer für all ansprach, als Pürchrechts recht ist vnd des Landes Recht in Österreich. Waer aber daz in, mit Recht daran icht abgieng oder daz sew mit Recht icht chrieg, oder ansprach, darauf gewunnen, von wem daz waer, daz sullen wir in, allez auzrichten, ablegen vnd wider chern. Taeten wir des nicht, waz sy dann des Schaden naemen, den ir ains, pey seinen trew^en gesprechen mag, an ayd vnd an all ander bewerunge, denselben Schaden sullen wir in auch genczlich, ablegen vnd widern chern, Vnd waz in, daran abget, daz sullen sy haben (dacz) vns vnd auf aller anderr vnserr Hab vnd gu^et, daz wi^er haben in dem Lande ze Österreich oder wo wir daz haben, wir sein Lemptig, oder tod, Daz in daz alles staet beleib von mir vnd allen meinen Erben, des gib ich in ze Vrchunde . den offen bri^ef . vnd wand ich obgenanter Rüdolf nicht aygens Jnsygels han, So hab ich vleizzich gepeten, den Erbern Herren Hern Petrein di zeit Pharrer dacz sand Michael, vnd Rechter Pu^ercherr des vorgenanten Weingarten, Vnd Niclan den Juden von Wachaw^e, daz sy der Sach zeug sind mit i^ern anhangunden Jnsygeln, in payden an Schaden . dar vnder wir vns verpinden, mit vnsern trewn, an aydes stat, allez daz stet ze haben, daz vorgeschriben stet. Der bri^ef ist geben an Mitichen, vor sand Luczeintag Nach Christi gepu^erde drew^e czechen Hvndert Jar dar nach in dem Sechs vnd Sybenczkisten Jare.

Source Fulltext: OÖUB 9 (Wien 1906) S. 177-178