Ich Ott der Chumpfmulner ze den zeiten gesezzen auf der selben mül, mein Hawsfraw vnd all vnser eriben veriehen vnd tuen chunt offenleich mit dem brief, allen den di in an sehent oder hornt lesen, daz wir versprochen vnd verhaizzen haben dem Erwirdigen vnserm gnadigen Herren Probst Albrecht dacz sand florian vnd seinem Goczhaws daselbs, Ob daz wer daz der spaicher oder sein eriben her fu^er chemen vnd chlagten nach der mul dacz freleitten, dez sullen wir ir furstand vnd auzrichter sein an allen irn schaden, wo in dez not geschicht. Teten wir dez nicht, waz si des schadens nemen, mit recht oder an recht, den schullen wir dem Probst vnd dem Goczhaws dacz sand florian auz richten an allen irn schaden, vnd sullen daz auch haben dacz vns vnd dacz vnsern trew^en vnd auf aller vnser Hab, wo wir die haben versucht vnd vnuersuecht, vnd dar vmb seczen wir auch zue sampt vns Vlrich dem Seydein von Ästen vnd Lijplein in dem Winckel, Ortlein in der Zagelaw, vnd Otten den mittermair dacz Dawchleitten vnd Chunrad bei dem Pach dacz Salmansleitten, Chunrad den Swedel von Asten, Ortlein den Mulner von freleitten, Nycklein den innermair von Dawchleitten, Henslein dez Dorfmaister sun von Ästen vnd Pilczlein von Ästen vnd Symon daselbs, fridrich den Rosenperiger, daz di alle selbgeschol vnd porigen sullen sein zu sampt vns, waz der vorgenant Probst vnd sein Goczhaws der vorgenanten sach schaden mochten nemen, daz er vnd sein Goczhaws daz vnuerschaidenleich sullen haben dacz vns vnd auf allem unserm guet, Vnd dar vmb geben wir den brief versigelten mit dez Erbern Herren Jnsigel Hern Seywoltz von Volkenstorff vnd fridrich dez Holczer anhangunden Jnsigeln, die ire Jnsigel an den brief gehangen habent durch vnserr vleizzigen bet willen in vnd i^ern eriben an schaden. Dar vnder wir vns verpintten mit vnsern trewn alles daz stet ze haben, daz oben an dem brief geschriben stet. Der geben ist nach Christi Gepurt Drewczehen Hundert iar vnd in dem New^en vnd Sibenczikisten Jar in der ersten Vastwochen.

Source Fulltext: OÖUB 9 (Wien 1906) S. 586-587