Ich Gerunch hern Choln sun ze den zeiten amptman des goteshausse ze neunburch vnd ich Leupolt von awe ze den zeiten amptman meins herren von Maynberch wir veriehen vnd tu°n chunt allen den, di disen Brief lesent oder heurent lesen, Daz Chu°nrat der Hosmunt vnd sein hausurawe vre Alhait mit zeitigem rat irre pesten freunde, mit gunst vnd gutem willen irre erben vnd mit gesompter hant verchauffet hawent ir Hofstat, der zwai tail eins halben jeuchs weinbachse ist, deu da leit ze neunburch an den Gastai zenechst dem weingorten, der da haizzet der Marcgraf, vnd irn weingorten, des dreu viertail sint, der da leit an dem Aychweg zenechst Chunrat des Soelden weingorten von Paszawe, Dem erberm manne wernharten dem Hosmunt Burger ze Paszawe vnd seiner hausurawen vren Margreten vmb ain vnd fumftzich march silbers wienner gewihts vnd vmb dreizzich pfunt Paszawer pfening, Der si seu gor vnd gaentzleich gwert hawent hintz Christen vnd hintz jvden, wo si seu solten gelten, Hawent auch sich die vorgnanten Chu°nrat der Hosmunt vnd sein hausurawe vre Alhait der Hofstat vnd des weingorten reht furziht getan mit vnser baider hanten, der Hofstat mit mein Gerungs des Choln hant, des weingorten mit mein Leupolts hant von awe also, Daz wernhart der Hosmunt vnd sein hausuraw vre Margret vnd ir paider erben di selben Hofstat vnd den weingorten furbaz ze rehten perchreht hawen suln ze verchauffen, ze versetzen vnd geben, wem seu wellen, an allen irresal, als perchrehts reht ist. Auch hawent sich gepunden mit irn trewen Chunrat der Hosmunt vnd sein hausurawe vre Alhait, Daz seu Wernharten dem Hosmunt vnd seiner Hausurawen vren Margreten vnd ir baider erben di Hofstat vnd den weingorten scherm suln fur sich vnd fur ir erben vnd fur alle ansprache, als Landes reht ist in Osterrich. naem darvber wernhart vnd sein hausurawe vre Margret oder ir baider erben der Hofstat vnd des weingorten furbaz dehainn schaden, von welher ansprache daz waer, den suln seu in gor vnd gaentzleich ablegen vnd suln seu daz auf irn trewn hawen vnd auf alle deu, vnd seu hawent. Des geben wir jch Gerunch der Chol vnd jch Leupolt von awe wernharten dem hosmunt vnd seiner hausurawen vren Margreten vnd ir baider erben disen Brief zv eim worn zeug vnd zv einer staetichait versigelten mit vnser baider insigeln. Des sint zeug Di erbern burger ze den Zeiten der Rat von der Stat, Gerbot vnd Christan di sluzzler ped, Gebhart vnd Ott der Hu°ter, Friderich hetzman, Seifrid am marcht, Friderich Moenseber, Chunrat smuchenpfeninch vnd ander frum leut genu°g. Der Brief ist gegeben, Ditz itz geschehen ze neunburch nach Christes geburt Dreutzehen Hundert jar, Darnach in Dem zwai vnd zwaintzigstem jar an sande vrbans tag.

Source Fulltext: OÖUB 5 (Wien 1868) S. 325-326, Nr. 335