Ich Christan der Pechminn svn vnd ich Gedravt sein havswrow veriechen vnd tv^en chvnd mit disem brief allen lavten, daz ich egenantev Gedravt mit gvnst vnd mit gu^etem willen vnd nach rat mein vnd meins ersten chanwierts Chv^enrats des Chravczer, dem Got genad, naster vnd pester eriben vnd vrevnt Ru^edleins Eylinsgrab, Vlrichs Fridreichs svn des Pyrichenworter vnd Petreins Ru^egers svn des Pyrichenworter vnd Vlreichs des Tenken vnd Wentlein seiner havswrowen vnd Ru^eger Ropot, recht vnd redleich verchavft haben mit gesampter hant vnd mit vnsers perchmaister hant Ortweins des Tuczen ze den zeiten amptman der erbern herren von Pavngartenperig durich rechter ehafter no^et willen von geltes wegen, da mich egenantev Gedravten mein vorgenanter seliger ersten (sic) chonwiert Chv^onrat der Chravczer ze geltinne lazzen hat mit gesampter hant hincz den juden, vnd durich des selben gelts willen haben wier verchavft vnd geben mit fu^erzieht vnsern weingarten mit alle dem nucz vnd rechten, alz er mit altem recht herchomen ist vnd des ain dryttail eins ganczen jevchs ist, leit an dem Aychweg zenast Gvndolten dem Tuczen, da man alle iar von dient ze rechtem perchrecht ainen emmer weins vnd zwen wienner phening ze voytrecht vnd nicht mer, vm vierczich phvnt vnd vmb ein halbz phvnt alz wienner phening, der wier gar vnd gancz gewert sein hincz den juden ze rechten tagen, dem erbern mann Jansen dem Hosmvnd mavter ze Pazzaw vnd wrown Chvnigvnten seiner hauswrowen vnd ier paider eriben, den sev gechavft habent vm ier aygenleich varvnd gu^et, fu^erbaz vreyleich vnd ledichleich ze haben vnd allen ieren frvm domit ze schaffen mit verchavffen, mit verseczen, mit verchavffen (sic) vnd geben, swem sev wellent, alz in daz allerpeste fu^egvnt ist, vnd darzu^e durich pezzrer sycherhait willen so seczen vnd pinten wier vns vnuerschaidenleich zesamp mit vnsern trevn ich egenanter .Christian vnd ich Gedravt sein hauswrow vnd ich Ru^edel Eylinsgrab vnd ich Vlreich vnd Peter der Pyrichenworter svn vnd ich Vlreich derTenke vnd ich Wentel seine hauswrowe vnd ich Rv^eger Rapot mit vnsern eriben für den vorgenanten weingarten dem erbern mann Jansen dem Hosmvnd mavter ze Pazzaw vnd wrowen Chvnigvnden seiner havswrowen vnd ier paider eriben ze rechten gewern vnd scherm fu^er allev ansprach, alz perchrechts recht ist vnd des lants recht in O^esterreich. Wer awer, daz in fu^erbaz dhaynerlai chrieg oder ansprach auferstu^end gen dem oft genanten weingarten, von swem daz wer, oder ob in mit recht daran icht abginge, daz sullen sev haben auf vns allen vnuerschaidenleich, alz wier oben genant sein, vnd auf allem vnserm gu^et, daz wier haben in dem land ze O^esterreich wier sein lemtig oder to^ed. Vnd daz der egenant chavf vnd scherm furbaz stet vnd vnzebrochen beleib vnd seyd wier alle, alz wier vorgenant sein, nicht aygen insygel haben, darvm verpinten wir vns alle mit vnsern trevn der voruerscriben red vnd wandlung vnder des erbern mans insygel Gvndolts des Tuczen vnd mit vnsers egenanten perchmaister insygel Ortweins des Tuczen vnd mit des erbern mans insygel Hainreichs des Du^erren, di all diser sache zevg sind an vnserr stat mit iren insygeln, des wier sev all gepeten haben, als wier egenant sein. Der brief ist geben nach Christ gepu^erd drevzehen hundert jar, darnach in dem fvmfczygistem jar a^echt tag vor phyngsten.

Source Fulltext: OÖUB 7 (Wien 1876) S. 183f., Nr. 182