ICH Hainreich von Polnhaim vnd mein housurowe Ann vnd all vnser erben veriechen offenleich mit disem brief vnd tu^en chunt allen den, die in sechent lesent oder ho^erent, daz wier mit wolbedachtem mu^et vnd mit aller vnser erben gutleichem willen vnd wart vnd nach vnser besten freunt rat ze chauffen gegeben haben vnser hu^eb ze Du^ern, die weiln Hatrtneyd vnd sein hausurawe hat von vns ze lechen gehabt vnd die vns ledig warden ist von in vnd von iren erben aus ier nuczz vnd gewer in die vnsern, vnd di weillen vnd emaln vnser rechcz vreis aygen gewesen ist. Wier haben auch in (sic) di selben hu^eb ze chauffen geben Hainrich dem Schickchen vnd sein erben zu^e den zeiten mautter vnd richter ze Linczz mit alle deu, vnd darzu gehort, alz wier seu vor gehabt haben ze holcz vnd ze veld gestypft oder vngestipft versucht oder vnuersu^echt, aus vnser nuczz vnd gewer mit sampt der monschaft in die iren vmb ainen gelt, des wier gar vnd gancz von in verricht vnd gewert sein also, daz iz ir rechcz vreis aygen schol sein, als iz vnser gewesen ist. Wir schu^ellen auch vnd vnser erben der vorgenanten hu^eb ze Du^ern vnd auch der selben aygensehaft darauf ier gewer sein, swo in des not geschiecht, allso lanczz recht ist ob der Ens vnd allso aygen recht hat. Waer, daz in die gewerschaft von vns mit ichten verzogen wu^erd, swaz seu des schaden naemen, den schullen wier in ausrichten vnd ablegen vnd widerchern an allen iren schaden gar vnd gancz vnd schullen sew daz haben dacz vns vnd daez vnsern trewn vnd auf aller vnser hab, swo wier die yndert haben, versu^echt vnd vnuersu^echt. Daz loben wier in mit vnsern trewn, swaz er oder seiner erben ainer gesprechen mag mit seinen trewen, den selben schaden schullen wir in ab ze tu^en (sic) gar vnd gancz mitsampt dem hauptgu^et. Taeten wir des nicht, was den der vorgenant Hainrich der Schickch oder sein erben der selben hu^eb schaden naemen, den er oder seiner erben ainer pey seinen trewen gesprechen mag, den selben schaden schullen wier in ablegen gancz vnd gar an alle verziechnu^ezz vnd in welichem gericht oder hinder welicher herschaft vnser hab gelegen ist, den selben hern pitt wir mit vleizz, daz er seu vnser hab alz vil gewelltig alz lang, daz si hauptgu^ecz vnd schadens davon becho^emen, vnd wer in der phantvng geholffen ist, der schol nyemancz veintschaft darvmb dulden. Daz die red furbas also staet vnd verchert (sic) beleib, darv^eber ze ainem waren v^erchund gib ich Hainreich von Pollnhaim in den brief versygilten mit meinem anhangunten jnsigel vnd zu ainer gezeugnu^ezz mit meinz vetern hern Jansen von Polnhaim anhangunden jnsygel vnd meins vetern Albr. von Polnhaim jnsygel vnd mit meins vetern Piligreims von Polnhaim anhangvndem jnsygel yn an allen iren schaden. Der brief ist gegeben nach Christes gepu^erd dreuczehenhundert iar vnd in dem vier vnd funifczisten iar an sand Bartholomeus tag.

Source Fulltext: OÖUB 7 (Wien 1876) S. 373ff., Nr. 363