Wier Albrecht von Gots gnaden hertzog ze O^esterreich, ze Steyer vnd ze Kernden tun chunt, daz fu^er vns chom vnser getrewer lieber Eberhart von Walsse hauptman ob der Ens vnd pat vns, daz wier daz vrownchloster grabes ordens seiner stifftung ze Slirbkch vnd allez daz gut daz er darzu^o geben hat, in vnsern scherm nemen vnd des vogt wêren. Daz haben wier getan durich desselben Eberharts von Walsse bêt willen also, daz wier vnser erben vnd vnser nachchomen des vorgenanten vrownchloster ze Slirbach vnd alles des, daz darzu^e geho^eret vnd auch alle des gutes, daz der obgenant Eberhart darzu^e geben hat, wie daz genant sei, vôgt vnd scherm sein wellen vnd schu^ellen vnd ander niemant nach den briefen, di der egenant Eberhart von Walsse daru^eber geben hat. Dauon gebieten wier allermenichlich ênstlich vnd wêllen bei vnsern hulden, daz niemand den obgenanten chlosterfrown ze Slyrbach an iren guetern, wie di genant sein oder wo di gelegen sein, chain beswerung noch irrung tu^e in dheinn wêg. Wer ez daru^eber tet, daz wêr gêntzlich wider vns. Des geben wier ze vrchund disen brief versigelten mit vnserm anhangundem insigel. Der geben ist cze Wien an mitichen nach sand Gorigen tag nach Christs gebu^erd drewtzehen hundert iar, darnach in dem fu^emf vnd fu^enftzigistem iare.

Source Fulltext: OÖUB 7 (Wien 1876) S. 411f., Nr. 399