ICH Kathrey hern Nyclas vnd Thomas der Hayden swester vnd ich Christan ich Alphart vnd ich Chlar ire chinder vnd vnser eriben veriehen offenlich mit dem brif allen den di in sehent oder horent lesen, daz wir recht vnd redlich ze chouffen geben haben vnser Guet di Osterhueb genant vnd swas darzw^e geho^ertt ze holcz ze veld ze wismat besuecht vnd vnbesuecht wi ez genant ist oder swo daz gelegen ist, mit allen eren rechten vnd nuczen vnd da zue gehoret, als ez vnser lehen gewesen ist von vnserm genedigen liben hern hern Ewerhart von Waltse zden zeiten houbtman ob der Ens, den ersamen wirdigen vnd geistleichen vrown vrown Mechthilden Abtessin ze Slirbach vrown Elspeten von Gundolfing ze den zeiten priorin vnd dem ganczen Conuent daselbes vmb sechs vnd fumfczik phunt alter Wienner phenning, der wir von in gancz vnd gar gericht vnd gewert sein, vnd seczen sew dez Guets in nucz vnd gewer mit aller stet, alz wir durich sullen recht sullen, vnd sein ouch dez ir geweren wo in dez not vnd durft geschiht, als chouffens vnd Landez recht ist ob der Ens also, daz si daz gu^et innhaben sullen vnd nuczen vnd niezzen, so iz in aller pest fu^egt, mit vns vnd vnser eriben gutleichem willen an alle vnsere irrung vnd widerredt. Daz di sache von vns furbaz stet sei vnd beleib, darvber geben wir den brif versigelten mit der vorgenannt vnser liben vreint hern Nyclas vnd Thomas der Haiden anhangenden insigeln, wand her Nicla dez Guets vnser trewer lehentrager gewesen ist. Der brif ist geben nach Christes gepu^erd tousent drew hundert jar darnach in dem newn vnd fumfczkistenn jar an dez heiligen hern sand Florians tag.

Source Fulltext: OÖUB 7 (Wien 1876) S. 645, Nr. 634