"Ich, Rueger von Hayhenpach(1), vergich vnd tven chunt allen den, dy disen prief sehent oder horent lesen. Das ich mit gueten willen vnd mit vertachten muet vnd mit rat vnd gunst meines vetern Haydenreichs han geben durch vnsers hails vnd sælden willen vnd selgeræt(2) vnsern voruodern, vns vnd vnsern nachchomen, dem chloster dacz vnser wrauen Slag, dem probst vnd den pruedern da selben, was si geniessen muegen, meines waldes cze czimmer, cze prennen vnd cze cauuen(8), vnd vischwaid(3) vnd wildpan(4) von Suobsoed(5) vncz an den Vinsterpach(6), czwaier meil lanch vnd ainer meil prait, mit mier vnd mit mein erben vnd nach chomen ewichleich cze haben an allen chrieg. Vnd darumb hat mier gegeben der probst vnd di samnung des vorgnanten goteshaus von ier beschaiden ier siech haus, do ich pawet mein haus dacz Haihenpach, vnd dar czu czehen phunt phening Pazzawer muens(9) cze ainem verchund. Vnd dar ubir gib ich yn disen prief, veringsigelten mit meinem jngsigel. Des sint geczevg: der vorgnant Haydenreich, mein veter vnd sein czwen suen Chunrad vnd Hainreich, Wernhart vnd Velreich dy Pochsruchker, Hainreich vnd Marchart ab dem Perg, Meinhart von Dyemdorf vnd ander pider levt genueg. Der prief ist geben nach Christes gepuert tausent iar, czwaihundert iar, dar nach in dem viervndsibenczigisten iar, an vnser vrawen tag, als sy geporen ward."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 25 (S 16), S. 44-45