"Ich Rveger von Haihenpach(1) vergich vnd tven chunt allen den di disen prief sehent oder hoernt lesen, das ich mit gveten willen vnd mit verdahten muet vnd mit rat vnd gvnst meines vetern Haidenreichs han geben durch vnsers hails und sælden willen vnd selgraet(2) vnsern voruodern, vns vnd vnsern nachchomen dem chloster dacz vnser vrawen Slag, dem probst vnd den prvedern da selb, was sy geniesen mvegen meines walds cze czimern, cze prennen vnd cze caufen(8), vnd vischwaid(3) vnd wilpan(4) von Swobzoed(5) vncz an den Vinsterpach(6), czwaier meil lank vnd ainer meil prait, mit mir vnd mit mein erben, vnd mit mein nochchomen, ewichleichen cze haben an allen chrieg. Vnd darvm hat mir geben der probst vnd dy samnung des vorgenanten gotshaus von ir beschaiden ir siechhaus, do ich pawet mein haus dacz Haihenpach, vnd darczv czehen phunt phening Pazzawer mvenzz(9) czv ainem verchvend. Vnd dar vebir gib ich dysen prief veringsigelten mit meim jngsigel. Des sint geczevg: der vorgnant Haidenreich, mein veter, vnd sein czwen zven Chunrad vnd Hainrich, Wernhart vnd Vlreich di Poksrukker, Hainrich vnd Marchart ab dem Perg, Meinhart von Diemdorf vnd ander pider levt genveg. Der prief ist geben nach Christs gepvert czwelfhvndert iar, darnach in dem viervndsibenczigisten iar, an vnser vrawn tag als si geporn ward."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 24 (S 15), S. 44-45