"Ich, Ortneid von Tannberch(1), vnd Vlreich(2) mein svn, vergehen vnd tven chunt allen den, di disen prief sehent oder hoerent lesen, daz Ott der Nymmervol(3) vnd Symon der Nimmervol(4), vnd Heinraich der Renolter(5), vnd sein svn Stephan(6), habent di drev volgveltigev lehen datz dem Newndorf(7), di si von vns ze rechten lehen habent, versetzet habent dem gotzhaus datz sand Marein Slag(8), vnd den prvedern da selb, ie der man sein lehen vmb zwai vnd fvemftzig phunt Passawer phenning vnd Symon der Nymmervol(4), di haistalt herwerig(9), vmb fvemfzehen phunt phenning, mit vnsrer hant vnd mit vnserm gveten willen ze rechtem satze. Also beschaidenleich vnd mit sogetanen gelueb, wann der probst vnd di prveder dez vorgenanten gotzhavzz mvegen erwerven vnd gewinnen den willen vnd di genad von vnserm herren dem pischolfs von Passaw(10), so schvell wir vnd loben daz auch mit vnsern trewen, daz wir di selben gvet machen vnd bestætigen mit vnsers herren hant dez pischolfs von Passaw, dem oft genanten gotzhaus vnd den pruedern datz sand Marein Slag ewichleich ze haben. Vnd daz daz dem selben gotzhavs stæt vnd ||
vnzerbrochen beleib, dar vber gib ich disen prief, versigelten mit meinem jnsigel. Dez sint gezevg her Vlreich(11) der pfarrer von Velden, Chunrat der Pevntner(12), Fridreich der Mvezzganch(13) von Velden, Seybot der Schuerf(14), Vlreich der amman ab dem Aygen(15), Ott dez probstz schreiber(16), vnd ander erber levt genvg. Der prief ist gegeben, do von Christes geburd woren ergangen drevtzehen hvndert jar, dar nach in dem dreistgisten jar, an sand Ayten(17) tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 125 (S 105), S. 134-135