"Wir, Otto, von Gotes gnaden herczog ze Oesterreich vnd ze Styr(2), veriehen vnd tuon chunt mit disem brief, daz wir den erbern geistleichen levten . . ., dem brobst vnd dem conuent ze dem Slege(3), daz vnser vrovwen stift ist, zv vordrist durch Got vnd durch vnser, . . . vnsrer brueder vnd vnsrer vordern hail vnd selde willen di gnad getan haben vnd tuon ouch mit disem brief also, daz si ewichleichen ains in dem jar, swenne ez in fuegt, an vnsrer maut ze Lintz(4) vnd an andern vnsern mavtten auf dem wazzer verfueren mugen ein phunt weites saltzes(5) vnd vier phunt chlaines saltzes an mautt vnd an alle irrung. Vnd do von gebieten wir allen vnsern mauttern vnd ampleuten, di auf der Tuenow(6) gesezzen sint, vestichleich vnd wellen, daz si in noch iern dyenern, di in disen brief zaigent, dhain irrung dar an tuon vnd si daz verfueren lazzen an alle mautt, als vor geschriben ist. Vnd daz in di gnad stête beleibe, geben wir in disen brief zvo einem offen vrchunde, versigelten mit vnserm jnsigel. Der geben ist ze Wienn, an mentag nach sand Mathie tag des zwelfbotten, do man zalt von Christes geburd driuzehen hundert jar, dar nach in dem ain vnd dreizgistem jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 128 (S 108), S. 135-137