"Ich, Symon der Nymmeruol(1), vergich vnd tven chunt allen den, di disen prief sehent oder hoerent lesen, daz ich mit verdachtem mvet vnd mit gvetem willen han verseczet probst Vlreichen(2) vnd den prvedern vnd dem gotzhaus datz sand Marein Slag(3), drev volgveltigev gvet di obristen datz dem Nevndorf(4a), mit meins herren hant, hern Jansen von Morspach(5), von dem ich dev selben gvet ze rechten lehen han gehabt ze holtz vnd ze velde versvecht vnd vnversvcht vmb ein genantz gvet, als meins vorgenanten herren hantvest sait, mit der beschaidenhait, ob ich immer so stathaft wurd, daz ich ze chauffen hiet vnd gechauffen moecht, daz mir di vorgenanten prueder di oft genanten gvet ze loesen oder ze chauffen svellen geben vnd anders niemant, vnd han auch ich gelvebt mit gesworen aid vnd mit meinen trewen, daz ich dez satz auf den vorgenanten gvetern gewer sol sein wider aller mænchleich, swo oder swie oft sein den egenanten prvedern vnd dem gotzhaus noet vnd duerft geschiecht. Vnd daz di red vnd di gelveb von mir vnd von meinen erben stæt vnd vnzebrochen beleib, dar veber gib ich disen prief, versigelten mit hern Sighartz(6) vnd hern Rvegers(7) ab dem Perg jnsigeln, wan ich aygens jnsigels nicht enhan. Dez sint gezevg her Ortneid(17) vnd her Chvnrat von Tannberch(16), her Chalhoh von Getzendorf(18), Wernhart(21) vnd Philipp(22) di Schenchen, her Wolfhart der pfarrer von Serleinspach(23), Irnfrid der Streitwitz(24), Pentz der schaffer von Valchenstayn(25), Vlreich der richter von Rorbach(26), Vlman(14) vnd Vell(15) sein svn von Woykendorf vnd ander erberr levet genveg. Der prief ist gegeben, do man zalt von Christes gebvrd drevtzehen hvndert jar, vnd dar nach in dem ayns vnd dreistkisten jar, an sand Joergen tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 130 (S 110), S. 137-139