"Ich, Symon der Nymmervol(1), vergich vnd tven chunt allen den, di disen prief sehent oder hoerent lesen, daz ich mit verdachtem mvet vnd mit gveten willen han verchauft vnd ze chauffen gegeben probst Vlreichen(2) vnd den prvedern vnd dem gotzhavs datz sand Marein Slag(3), ayn volgveltiges gvet datz dem Nevndorf(4b) daz niderist, vnd ein haistalt herberig(27), di oben leit in dem dorf, ze holtz vnd ze veld, versvcht vnd vnversvecht, di ich von meinem herren, hern Ortneid von Tannberch(17) ze rechtem lehen han gehabt. Vnd han auch ich den vorgenanten prvedern vnd dem gotzhavs bestætigt einen satz auf den selben gveten, mit der beschaidenhait, ob ich immer so stathaft wuerd, daz ich ze chauffen hiet, oder gechauffen moecht, daz di vorgenanten prveder di vorgenanten gveter niemant svellen ze chauffen geben, nvr mir. Vnd han auch ich gelvebt vnd verhaizzen mit gesworen ayd vnd mit meinen trewen, daz ich der oft genanten gveter gewer sol sein fver all ansprach, swo oder swie oft sein den vorgenanten prvedern duerft vnd not geschiecht. Vnd daz daz stæt vnd vnzebrochen sei ewichleichen, dar veber gib ich disen prief, versigelten mit hern Sighartz(6) vnd hern Rvegers(7) ab dem Perig jnsigeln, wan ich aygens jnsigels nicht enhan. Dez sint gezevg her Prsibik der purcraf ze Chrumnav(8), her Bvsk von Lavkav(9), her Nyclo von Passawerslag(10), Vlman(28) vnd Heinreich(29) der Schvetz von Rosenberch, her Chvnrat von Tannberch(16), her Chalhoh von Getzendorf(18), Seyfrid(19) vnd sein sven Seydel(20) von Hvbenperg vnd ander erber levt genvg. Der prief ist gegeben, do man zalt von Christes gebvrt drevtzehen hvndert jar, vnd dar nach in dem ays vnd dreistkisten jar, an sand Joergen tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 131 (S 111), S. 137-139