"Ich, Symon der Nimmeruol(1), vergich vnd tven chunt allen den, di disen prief sehent oder hoerent lesen, di nv lebent oder her nach chvemftig werden, daz ich mit verdachten mvet vnd mit gveten willen han verchauft vnd ze chauffen gegeben, probst Velreichen(2) vnd den prvedern vnd dem gotzhaus datz sand Marein Slag(3), drev volgveltigev gvet datz dem Nevndorf(4a) di obristen, ze holtz vnd ze velde, versvecht vnd vnuersuecht. Vnd han auch ich den vorgenanten prvedern vnd dem gotzhaus auf den vorgenanten gvetern bestætiget einen satz, als meins hern von Morspach(5) hantvest sait, der des vorgenanten gvet herr vnd verleiher ist mit der beschaidenhait, ob ich immer so stathaft wurd, daz ich ze chauffen hiet oder gechauffen moecht, daz di vorgenanten prveder di vorgenanten gveter niemant schvllen ze chauffen geben, nvr mir, vnd han auch ich gelvebt vnd verhaizzen mit gesworen ayd vnd mit meinen trewen, daz ich den oftgenanten gvetern gewer sol sein fver alle ansprach, swo oder swie oft sein den vorgenanten prvedern vnd dem gotzhavs dverft vnd not geschiecht. Vnd daz di red vnd di gelveb von mir ewichleichen stæt vnd vnzebrochen beleib, dar veber gib ich disen prief, versigelten mit hern Syghartz(6) vnd herrn Rvegers(7) ab dem Perg jnsigeln, wand ich aygens jnsigels nicht enhan. Dez sint gezevg her Prsibik der purcraf ze Chrumnaw(8), her Bvesk von Lavkav(9), her Nyclo von Passawerslag(10), Wolech(11), Prsiedwor(12) vnd Qual(13) von Chirichslag, Vlman(14) vnd sein sven Vlreich(15) von Woikendorf, her Chvnrat von Tannberch(16) vnd her Ortneit(17) sein veter, her Chalhoh von Getzendorf(18), Seyfrid(19) vnd sein svn Seydel(20) von Hvbenperg, vnd ander erber levet genveg. Der prief ist gegeben, do von Christes gebvrd worn ergangen drevtzehen hvndert jar, vnd dar nach in dem ayns vnd dreizkisten jar, an sand Joergen tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 129 (S 109), S. 137-139