"Ich, Eberhart von Walse(1), lant richter ob der Ennse, vergich vnd tuen chunt alle den, die disen prief lesent oder horent lesen, daz die ersamen herren pruder von dem Theuchenhauz(2) ze Wienne(3), gechauft habent von der erwern vrow, vrow Alhaiten Pentzen(4), witiben, von Swechent(5), vnd von iren chinden, ein halbeu mule(6), haist in dem grunt auf der Swechent vm fumf vnd achtzig phunt Wienner phennig, vnd ||
wan die selben chint cze der czit nicht foitwer waren, do der chauf geschach, habent si den zehent halben, datz Winchel(7), der weilen der herren von Slegel(8) hwaz, habent si daz gelt an den zehent gelait, der ir lehen von mir ist, den habent si mit miner hant ze ebenteuer gesatzet, vuer daz vor genantz gelte, ob seu chan ansprach angieng von den chinden, so solten seu auf dem selben zehent irz guetez do von chomen. Daz in die sach stete pelibe, dar vber gib ich den vor genanten herren disen prief ze vrchunt vnd zu gezeug, bestetigt mit meinem insigell. Der prif ist gegeben nach Christez gepurt dreutzehen hundert jar, dar nach in dem fumf vnd dreizigistem jar, an dem nastem mitichen nach sant Mertinez tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 133, S. 140