"Wir, Johanns(1), von Gotes gnaden bischof ze Pazzaw, bechennen vnd tun kuent offenleich mit dem brief allen lâwten ewichleich, das wir von wegen der chrieg, stoezz vnd misshelung, die do zwischen vns vnd vnserm gotzhaws an einem têil, vnd des erwirdigen vnd geistleichen lawten, vnserr lieben in Got hern Heinreichs(2) probsts, Vlreichs(3) prior, vnd des conuents des chlosters vnserr frawn ze dem Slegel, vnsers bistums an dem andern teil, vmb ettleiche gueter, wâld vnd gruendt warn, selb riten auf die gemerkcht, vns der gar aigenleich gen in zu eruarn. Doselbs wurden wir in gegenwuertichait ettleicher vnserr korherren vnd vil erberr ritter vnd chnecht von den egenanten probst, prior vnd conuent gar vleizz(a) vnd ernstleich gepeten, das wir die sache ruehten an vns ze nemen vnd darumbe ansprachen, des wolden si ien dem gueten getrawn, so si zu vns hieten, gântzleich hinder vns gen, vesttichleich stât ze haben vnd zu ennden, was wir darumb sprâchen. Vnd wannd vns gar swâr dâwchte, die sache an vns zu nemen, widerten wir es vnd satzten vns lânng darinne, doch zu leste wurden wir mit grozzen duemuetiger pet der egenanten probsts, prior vnd conuents vnd vil erberr lâwt vberkoemen, das wir die sache an vns nâmen, wie swarleich es vns ankoeme, vnd si sind auch hernach der sache aller willichleich vnd gern hinder vns gentzleich geganngen vnd habent vns des irn hindergankchbrief geben, besigelten mit seinem, des probsts, vnd des conuents angehanngen insigeln. Vnd wannd dieselben chrieg, stoezz vnd misshelung zwischen vns vnd jn waren von wegen der gemerkchte von Obernflâtting(4) auf vntz in den Vinsterpach(5) zwischen der grozzen Muehel(6) vnd der chlainen(7), haben wir vns derselben gemerkchte vnd was do zwischen ligt, mit beschawung, mit briefen, vrkunden, weisung vnd rechten baider teil eruarn, so wir aigenleichist mochten, an geuâr, vnd haben vber die vorgemelten chrieg, stoezz vnd misshelung all durich frides suens vnd guetes gemaches willen baider teil mit gunst, willen vnd nach rat vnsers erwirdigen capitels ze Pazzaw vnd anderr vnsrer râte vnd getrewn, mit guter gewizzen, nach hail vnserr sele wolbedêchtleich in dem name Gotes gesprochen vnd sprechen auch wizzentleich mit dem brief, als hernach geschriben stêt. Bei dem ersten, was von Obernflâtting gelegen ist in den tobel zwischen Cherspawmaw(8) vnd Weichselpawm(9) vnd in demselben tobel auf zwischen vnsers dorffs ze Chirichpach(10) vnd irs dorffs ze Hohenperig(11) vntz zu irem dorff ze Mitternrâwt(12) vntz auf den alten schefweg(13), das dasselbe dem egenanten chloster beleibe. Vnd wie das ist, das vnser voruodern selig vnser gotzhaws vnd wir die Cherspawmaw vnd die drew doerffer in der obern und nidern Tiergrueben(14) vnd im Prewer(15) lannge zeit in nutz vnd gewer herbracht vnd vntzher inne gehabt haben, doch geben wir von sundern genaden dieselben Cherspawmaw, baid Tiergruveb vnd im Prewer vnd was darzu gehoert, was des enhalb des alten schefwegs gen der grozzen Muehel gelegen ist, dem egenanten chloster, dobei fuerbas ze beleiben an allen chrieg. Darzue sol auch demselben chloster, was suest ligt enhalb des alten schefwegs gen der grozzen Muehel wertz auf entrichts nach demselben alten schefweg vntz in das chlain Muehelhâupel(16), vnd von demselben Muehelhâupel in das Truebpachel(17), vnd von demselben Truebpâchlein vntz in den Vinsterpach, wie das genannt ist, hinfuer auch beleiben an alles geuâr, ausgenomen vnser vnd vnsers gotzhawss lehenrecht, vnd ob ander lâwt icht rechtens doselbs habent. Was aber hiedishalben Cherspawmaw gen der chlainen Muehel auf vntz auf den alten schefweg vnd hiedishalben desselben alten schefwegs auf nach den obgenanten gemerkchten gelegen ist, es sein doerffer, gueter, aekcher, wismad, oed vnd wâld, wie das genannt ist, dasselbe alles sol vns vnd vnserm gotzhaws beleiben, auch an allen chrieg, ausgenomen zwair guet ze Weichselpâwm, zwair guet ze Stierberch(18), vnd dreyr guet ze Martslag(19), dieselben siben guet, die beleibent voraus dem egenanten chloster, als die enher darzu gehoert habent. Was auch brief vnd vrkund furbas furbracht vnd gezaigt wurden, wie sich das fuegt, die den gegenwuertigen vnsern spruechen vnd spruchbrief schadhaft wârn vnd schaden bringen moechten, es waer mit recht oder an recht, dieselben brief vnd vrkund alle suellen all ab vnd tod sein, vnd dowider dhain kraft haben, vngeuerleich. Vnd zu sichtigem vrkunde vnd staeter vester sicherhait aller vorgeschriben vnserr spruech vnd sache, haben wir machen haizzen zwen brief in geleicher lawtte, der wir einen der gegenwuertigen brief den obgenanten probst, dem conuent vnd irm chloster ze dem Slegel geben, vnd den andern wir vns, vnserm gotzhaws vnd vnsern nachkomen behalten haben, die baid besigelt sind mit vnserm vnd mit des obgenanten, vnsers erwirdigen capitels vnserer korherren ze Pazzaw angehanngen insigeln, die ir insigel an die selben baid brief zue zewgnuezze der vorgeschriben sach vnd hanndlung gehanngen habent, jn an irs capitels hab vnd guetern, die es besunderleich hat, an allen schaden. Geben an sand Margreten abent, nach Kristi geburde drewtzehen hunder iar, vnd in dem fuenf vnd achtzigistem jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 203 (S 142), S. 203-205