"Ich Haynreych der Schuerff(1), dye czeyt gesessenn jn dem haws czue Langenhals(2), mein eleychew hawsfraw Anna vnd all vnser eribenn, dye wyr yeczund haben oder noch hyn fwer chunftigchleych gewinnen, wyr veryehen vnd tuen chuntt mit dem brieff allenn denn, dye yn sehent oder lesent hornt, das wyr rechtt vnd redleych chawffleych czue chawffen haben geben czue der czeytt vnd weyll, do wyr es wol mitt rechtt getuen mochtten, vnd nach vnser nachsten pesten frewntt ratt willen vnd gunstt dem erbyrdigen vnd geystleychen herrenn, herrn Mertenn(3), probst czue vnser frawn Slag vnd dem wyrdygen goczhaws vnd conuentt daselbs, unsrew drytthalb guett czue Czagelaw(4) vnd ganczen czehentt darauff, von erstt das gancz guett da dye czeytt Vlreych der alt Scherrer(5) auff sycztt, vnd ayn gancz guett da dye czeytt der Hansel(6) auff sycztt, vnd ayn halbs guett, da dy czeytt Stephel der jung Scherrer(7) auff sycztt, vnd dye gelegen synd jn Aygner pharr vnd in Veldner lanttgerichtt, vnd synd lehen von dem obgenanttenn, meinem genaedigen herren, herrn Mertten vnd von dem wyrdygen goczhaws vnd conuentt daselbs, vnd gehoertt auch dye chunigsteuer(8) von denn obgenantten guettern czue dem ob genantten goczhaws, vmb ein geltt, des vnss woll genuegtt hatt vnd wyr gancz vnd gar gerichtt vnd gewertt seyn cze rechten taegen, vnd ann all vnser schaeden. Wyr anttwuertten yn auch dye obgenantten drytthalb guett mitt samptt dem obgenantten czehentt, auss vnser nuecz vnd gewer in dy yren mitt allen denn ern, rechtten vnd gultten czue holcz, cze velld, cze wayd, cze wysmad, als von alter her synd chomen, vnd als wier sew yn gehabtt vnd genossen haben, nichcz ausgenumenn. Wyr seyn der obgenantten guetter vnd czehent mitt aller yr czuegehoerung des obgenantten goczhaws vnd conuencz rechtt gewern vnd fuerstantt fuer all ansprach an aller der statt vnd yn sein noett vnd duerfftt geschyechtt, also chauffs vnd landes rechtt yst jn dem lantt ob der Enns. Gyeng aber dem ob genantten goczhaws vnd conventt mit rechtt an dem chawff vnd gewerschafftt ychtt ab, es waer mitt geystleychem oder werleychem rechtt, das schullen sew als haben, dacz vns vnd vnsern trewn vnd dar czu auff aller vnser hab, wo wyr dye vberal yndertt haben, ynner landes oder awsser landes, awff wasser oder awff lantt, verswechtt vnd vnversuechtt, nichcz awssgenumenn. Das yn der chawffl [!] also staett vnd vnczebrochen beleyb von vns, dar vber gib jch denn brieff, besigelt vnd wollbestatt mitt meinem aygen anhangunden jnsigel, vnd czue eyner pessern sycherhaytt, warn vrkuntt vnd czewgnuess besigeltt mitt meins lieben prueder Bernhartt des Schuerffenn(9) anhangundem jn sigel, vnd dar czwe so hab wyr gepeten vleyssig denn erbern Eglolff denn Newnchyrcher(10) dye czeyt lantrichter czwe Veldenn, vnd denn erbern Thoman denn Raspenn(11) von Plwmaw, vnd denn erbern Hansenn denn Panhalm(12) dye czeyt phlegaer czwe Schallenberkch, /(13) vnd denn erbern Hartlieb denn Wolffsfuertter(14) dye czeytt phlegaer czwe Hoff, das sew des chawffs mitt samptt vns geczewgen sein mitt yr aller vyer anhangundenn jnsygel, yn allenn vnd yrn erben ann schaedenn. Geben nach Cristi gepuerd, alcs man czaltt vyerczehen hundertt jar, dar nach in dem czelifften jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 261 (S 171), S. 274-275