"In nomine Domini. Amen. Anno a natiuitate eiusdem millesimo quadringentesimo decimo nono, jndiccione duodecima, die vero quarta mensis aprilis, hora vesperorum vel quasi, pontificatus sanctissimi in Christo patris ac domini nostri, domini Martinj(1), diuina prouidencia pape quinti, anno secundo, coram reuerendo in Christo patre ac domino, domino Wenceslao(2), sancte sedis apostolice prothonotario ac ecclesie Patauiensis preposito et archidiacono, jn mei quoque notarij publicj ac testium subscriptorum ad hoc specialiter vocatorum et rogatorum, presencia personaliter constitutj. Venerabilis in Christo et religiosus vir, dominus Wernhardus(3), prepositus monasterij Plagensis, ordinis Premonstratensis, Patauiensis diocesis, nomine sui et ipsius venerabilis conuentus ibidem ex vna, necnon honorabilis vir dominus Vdalricus Grwber(4), pretendendum se rectorem parochialis ecclesie jn Rorbach(5), partibus ex altera. Super omnibus et singulis suis litibus, causis et contrauersijs in Romana curia seu extra eandem, occasionem eiusdem ecclesie in Rorbarch hucusque quomodolibet inter dictas partes exortis, non compulsi neque coacti, sed sponte et libere ac voluntarie huiusmodi litibus cesserunt atque renunciauerunt, quibus procul motis in prefatum dominum Wenceslaum vnanimiter ambe partes ad pronunciandum inter eas de et super dicta ecclesia consenserunt, atque de alto et basso efficaciter compromiserunt. Quiquidem dominus Wenceslaus huiusmodi pronunciamentum in se recipiens, matura deliberacione prehabita pronunciauit in hunc modum: primo, quod idem dominus Vdalricus remanere debet circa eandem ecclesiam in Rorbach tamquam verus possessor, et ipso domino preposito Wernhardo eiusque conuentui et ipsius ac eorundem successoribus annuatim administrare debet a die hodierna incipiendo, et tenebitur administrare censum consuetum a quolibet rectore ecclesie jn Rorbach ipsi monasterio jn Slegel debitum, videlicet sedecim libras denariorum vsualis monete angariatim quatuor libras vnacum quatuor libris denariorum venerabili domino . . custodi ecclesie kathedralis Patauiensis protunc existenti, absque contradiccione quemadmodum semper per antecessores ipsius et ipsorum fuisset tentum et obseruatum soluendi; secundo, quod omnia munimenta ipsius domini Vdalrici, mox et ad statim erga prefatum dominum Wenceslaum archidiaconum et ad suam potestatem reponi debeant; tercio, quod ipse dominus Vdalricus Grwber ab ipso venerabili domino Wernhardo preposito tamquam vero collatore eiusdem ecclesie in Rorbach, de nouo collacionem recipere debeat et tenetur, litterasque suas presentacionis et consequenter a reuerendo in Christo patre ac domino, domino . . episcopo Patauiensi(6), ad eandem ecclesiam confirmacionem obtinere, ad que omnia et singula facienda ipse dominus Vdalricus absque contradiccione se voluntarie asstrinxit, ymo obligauit. Quiquidem dominus Wernhardus, prepositus et collator ad statim ipsi domino Vdalrico Grwber coram ipso genua flectenti et humiliter id petenti tamquam tali, cui interest, et ad quem prouisio, presentacio seu alia queuis disposicio pleno jure dinoscitur pertinere, eandem ecclesiam jn Rorbach cum omnibus juribus et pertinenciis suis effectualiter contulit sibique pariter eandem assignauit. Quiquidem dominus Vdalricus mox et ad statim predicto domino Wernhardo preposito obedienciam fecit manualem de tenendo et recognoscendo, ipsum de cetero ac omnes suos successores ad huiusmodi preposituram canonice intrantes pro suo prelato, domino et collatore et signanter quod prefatam annuam pensionem, sic vt premittitur, a singulis rectoribus sue ecclesie jn Rorbach et prefato monasterio debitam et expressam, absque diminucione et contradiccione quibuslibet fideliter et effectualiter eo existente in humanis, et ipsam ecclesiam regendam seu possidendam ipsi domino Wernhardo, preposito et collatori ac suis collatoribus, prepositis et sequacibus vellet, prout teneretur tradere, debitoque tempore absque vlteriorj protestacione presentare et tamquam obedienciarius assignare. De quibus omnibus et singulis tam dominus Wernhardus, dignus prepositus et collator eiusdem ecclesie, quam ipse Vdalricus Grwber rector institutus ad eandem pecierunt sibi per me notarium publicum infrascriptum, vnum vel plura, tot quot forent necessaria, confici publicum seu publica jnstrumenta. Acta sunt hec Patauie, jn stuba maiorj curie habitacionis suprascriptj domini Wenceslaj prepositi ac jn curia clericorum prope ecclesiam kathedralem Patauiensem, anno, indiccione, die, mensis, hora et pontificatus, quibus supra, presentibus ibidem honorabilibus ac discretis viris, domino Johanne dicto Lyebenstain(7), capellano in Cellis alias In Griespach(8), Cristanno Slegel(9) de Nicolspurga camerario, et Thoma Pharrkircher(10) bedello et eiusdem domini prothonotarij et archidiaconi nuncio iurato, prebitero et laicis literatis Patauiensis et Olomucensis diocesis testibus circa premissa."||
||
[NOTARIATSSIGNET] "Et ego, Leonardus Foerster(11), clericus Patauiensis, publicus auctoritate jmperialj ac memorati domini archidiaconi ac consistorij Patauiensis iuratus scriba et notarius, quia dictarum parcium conparicioni, litium renunciacioni, consensui, compromissioni, pronunciacioni, collacioni, obligacioni et protestacioni, alijsque premissis vnacum prenotatis testibus, coram ipso domino prothonotario, dum sic agerentur, presens interfuj. Eaque sic fierj vidi et audiui, jdeoque hoc publicum jnstrumentum manu propria scriptum et confectum, signo et nomine meis solitis appositis roboratum, publicauj per venerabilem in Christo patrem dominum Johannem(12), modernum prepositum monasterij Plagensis, in fidem rogatis et requisitis."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 273 (S 182), S. 292-293