"Wir die hernach geschriben mit namen Dangkhart Herleinsperger(1) die zeit pfleger zue Neun Burgkh auf dem Jn, Mathes Egkher(2), Mengkhofer(3), Lienhardt Perger(4), Walther Schallnberger(5), Caspar Mulher(6) vnnd Hanns Amlstorffer(7): Bekhennen ||
aintrechtigkhlich vmb solch abred des todsschlags zwischen Jörgen des Rustorffer(8) säling freundten vnnd des ersamen herrn Wolffgangen ab dem Perg(9) beschehen ist von wegen des todtsschlags, so der benannt herr Wolffgang an Jörgen Ruestorffer seling begangen hat vnd gethan hat. Jtem von erst haben wir obgenant all aintrechtigclich bered, das der ehgemellt herr Wolffgang ain ewige wochen mess gein Rorbach in die capellen(10), do die Ruestorffer jre begrebnus haben, zwischen hinne gebung des brieffs vnnd sannt Michaelstag schierst ohnuerziehen machen, volbringen, stifften vnd nach aller notturfft versorgen soll, auch das dieselb ewig mess jarlich alle wochen an dem pfinstag gehalten soll werden, es wäre dann, das an demselben pfinstag ain sollicher hochzeitlicher tag geuiel, das die benannt wochen mess nit volbracht mocht werden, so soll dieselb wochen mess des nächsten tag vor oder des nächsten tag hinach vngeferlich in der wochen, die vorgemellt messen volbracht werden. Vnd in welchen wochen die mess nit volbracht wurdt, so soll sich alweg ein halb pfundt wax verfallen sein in das zechschrein daselbst. Jtem es ist auch mer geredt worden, das der vorgenannt herr Wolffgang dem obgenannten Jörgen Ruestorffer seligen ainen ewigen jartag stifften soll, vnnd das der jartag järlich gehallten vnnd volbringen, ains jeden jars albegen in den nächsten acht tagen vor sant Michaels tag oder in den nächsten acht tagen hinnach, vngeuerlich. Des nachts mit ainer gesungen vigilj vnd des morgents mit ainem gesungen seelambt vnnd mit ainer gesprochen mess. Vnnd der priester, der das seelambt singt, soll sich nach dem euangelj bej dem alltar vmbkheren vnd vmb Jörgen des Ruestorffer vnd vmb all glaubigen seelen bitten. Jtem es soll auch der benent herr Wolffgang sein lebendig tag in der obgemellten capellen dem vorgenanten Ruestorffer saligen halten vnnd volbringen aber ein wochen mess, aber in yeder wochen an dem erichtag, in massen vnnd bej der peen, als oben in der obgemellten mess begriffen ist, vngeuerlich. Vnd wan herr Wolffganng mit todt abgeet, so soll die benannt wochen mess des erichtags auch gar, ab vnnd hin sein. Es ist auch mer beredt worden, das der offtgenant herr Wolfganng des ehgemellten Ruestorffer seel haben begeen vnnd volbringen zwischen hinnen vnnd sunnewenten schirst khunfftig zue Rorbach ain grebnus mit zwain vnd dreissig messen vnnd mit zwain vnnd dreissig erbern mannen, die mit jhm gein opffer geen mit dreien pfening vnnd mit ainer khertzen von ainem halben pfundt wags, vnnd die khertzen sollen bej dem gotshaus bleiben daselbs. Vnnd wann er die grebnus allso haben vnnd begeen will, das soll er des Ruestorffers freundten vierzehen tag vor verkhunden. Jtem mer ist gered worden, das herr Wolffgang stifften soll ain ewige gedechtnus allso, das der briester daselb all feyrtag auf der cantzel vmb Jörgen des Ruestorffer seel vnnd aller der seel, die aus dem schlecht verschaiden seint, bitten soll, getreulich ongeuer. Jtem, vmb ain Rhomfarth(13) vnd Achfarth soll besteen bej herrn Wolffgang. Es ist auch bered, ob herr Wolffgang mit todt in der zeit abgieng, das dan seine brueder(11) das alles, so begriffen ist, volbringen, was er nicht volbracht hiet. Die vorgeschriben abredt alle soll Vlrich Püchler(12), die zeit pfleger zum Wernstein, bringen an des Ruestorffers freundt. Die sollen die waal haben, ob sy solch abrednus stät hallten wollen, vnd herr Wolffgang soll kain waal haben, / ob sy solch abred /(14) vnnd was des Ruestorffer freundt in dem allen halten oder lassen wollen, das soll man herr Wolffgang in den nächsten / herr / vierzehen tagen nach datum des brieffs khundt vnnd zu wissen thuen, damit das er sich auch weiss zu richten(15). Zue vrkhunt haben wir, obgenannt all, yeder thaill ain solliche bered zetl geben mit meinem, des egemelten Herleinsperger aigen furgetrugkhten pedtschafft, doch mir vnd vnns obgemellten allen on alle zuspruch vnnd schaden. Geschehen am erichtag nach dem sontag Reminiscere in der vasten. Anno Domini M: CCCCo: tricesimo nono."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 688, S. 750-751