"Nos Nicolaus(1), Dei et apostolice sedis gracia episcopus Magionensis, reuerendi in Christo patris et domini, domini Leonardi(2), eiusdem Dei gracia episcopi Patauiensis cooperator in pontificalibus generalis. Vniuersis christi fidelibus has litteras inspecturis, salutem in Domino sempiternam. Vniuersitati uestre notum facimus per presentes, quod anno Domini Mo. CCCCo. XLIo. die XXV mensis septembris reconciliauimus ecclesiam parrochialem sancti Jacobi in Rorbach cum suo cimiterio et capellis annexis, que ante tempora crudeli Hussitarum(3) persecucione inualescente per eosdem lamentabile extitit exusta. Die uero XXVI eiusdem mensis consecrauimus quatuor altaria in ecclesia predicta, altare chori in honore sancti Jacobi apostoli, altare sinistrum in honore beate Marie virginis, altare in medio ecclesie in honore sancti Johannis ewangeliste, altare sinistrum in honore sancte Katharine virginis. Et quintum altare in veteri capella(4) in honore sancte Anne matris Marie. Et sanctorum, quorum reliquie recluse sunt in altaribus predictis, prout in epithauijs desuper confectis continetur. Consecrauimus eciam die XXVII predicti mensis in capella noua(5) duo altaria, altare principale in honore sancti Georij martiris, et altare ad latus sinistrum in honore sancte Marie Magdalene. Et sanctorum, quorum reliquie sunt recondite in eisdem. Cupientes igitur, ut ecclesia predicta cum suo cimiterio et altaribus et capellis annexis congruis honoribus venerentur et a cunctis christi fidelibus deuocius frequententur, omnibus vere penitentibus et confessis, qui ad dictam ecclesiam, altaria et capellas in singulis beate Marie virginis festiuitatibus ac omnibus alijs infra scriptis, videlicet natiuitatis Domini, circumcisionis, epiphanie, per totam quadragesimam, parasceuensis, pasce, ascensionis, penthecostes, trinitatis, corporis Christi, jnuencionis et exaltacionis sancte crucis, sancti Michahelis, sancti Jacobi apostoli dicte ecclesie patroni, jn festiuitatibus omnium apostolorum, sanctorum Johannis baptiste et euangeliste et omnium aliorum euangelistarum et quatuor doctorum Romane ecclesie, jn die omnium sanctorum et omnium animarum, dictam ecclesiam, cimiterium, altaria, capellas annexas causa deuocionis accesserint seu missis et predicacionibus aut alijs diuinis officijs ibidem interfuerint, uel corpus Christi seu oleum sacrum, cum portantur infirmis, secuti fuerint, aut qui in serotina pulsacione campane flexis genibus ter aue Maria dixerint, uel qui ad fabricam dictam luminaria, ornamenta, vestimenta, libros, calices, aurum, argentum, animalia tam in eorum testamentis, quam extra donauerint aut legauerint seu legari procurauerint, seu quouis alio modo dicte ecclesie manus porrexerint adiutrices. Et qui pro salubri statu domini Wolffgangi dicti de Monte(6), tunc pastoris sepe dicte ecclesie, necnon animabus parentum, amicorum seu benefactorum suorum et omnium fidelium defunctorum pie Deum orauerint, quencumque, quocienscumque uel ubicumque premissa uel aliquid premissorum deuote fecerint, de omnipotentis Dei misericordia et beatorum Petri et Pauli apostolorum, eius auctoritate confisi, quadraginta dies indulgenciarum de iniunctis eis penitencijs misericorditer in Domino relaxamus. Jn cuius rei testimonium sigillum nostrum pontificale presentibus est appensum, anno, diebus et loco prenotatis."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 705 (Ro 1), S. 767-768