"In nomine Domini. Amen. Anno natiuitatis eiusdem Mo. CCCCo. XLIIIIo. indictione septima, die uero iouis sedecima mensis ianuarij hora vesperorum uel quasi, sacrosancta generali sinodo Basiliensi(1) durante ac serenissimo et inclytissimo principe et domino nostro, domino Friderico(2), Romanorum rege semper augusto etc regnante, in mei, notarij publici testiumque infra scriptorum ad hæc specialiter vocatorum et rogatorum præsentia personaliter constituti. Venerabilis pater dominus Ioannes(3) præpositus monasterij in Plaga(4), ordinis Præmonstratensis eius et sui conuentus nomine ex vna, et honorabilis dominus Wolfgangus Perger(5), plebanus in Rhorbach, Patauiensis diocæsis, partibus ex altera, asserentes et quilibet eorum asseruit nonnullas lites, controuersias et dissensiones inter ipsos dominos præpositum, conuentum et plebanum de et super quadam annuali pensione de dicta ecclesia Rhorbach præfato monasterio in Plaga, ut dicitur, reseruata, necnon in parochialium administratione, et quorundam fructuum prouentu et obuentione de quadam capella lignea uulgariter Zu dem Heyligenstain(6) prouenientium perceptione et horum occasione dudum fuisse exortas, uolentes ad pacem et concordiam anhelare, laboribus parcere et expensis litiumque euentus qui dubij sunt et anfractus euitare, non ui, dolo, fraude, seu metu decepti, sed sponte, libere, ac certa ex scientia et spontanea uoluntate de alto et basso in honorabiles et circumspectos viros, magistrum Erhardum(7) in Asparn, dominum Wolfgangum(8) in Waldkhirchen ecclesiarum parochialium rectores, Andream Aychberger(9) de Wegschaid, et Bernhardum(10) de Haslach, laicos et armigeros dictæ Patauiensis diocæsis tamquam in arbitros, arbitratores et amicabiles compositores compromiserunt et quilibet eorum modo præmissis compromisit dandum et concedendum dictis suis arbitris, arbitratoribus et compositoribus plenam et liberam potestatem de et super præmissis controuersiis, dissensionibus, de pleno et sine strepitu seu figura judicij examinandi, cognoscendi, pronunciandi, laudandi, arbitrandi et amicabiliter concordandi altè et bassè semel uel pluries sicut eis uidebitur expedire, promittentes nichilominus præfati domini præpositus et plebanus nominibus quibus supra stipulatione solempni omnia et singula per dictos arbitros, arbitratores et amicabiles compositores pronuncianda, arbitranda et laudanda se rata et grata habere tenetur et in ullo contraire sub pæna per dictos arbitros, arbitratores et amicabiles compositores affligenda. Qui quidem arbitri et compositores amicabiles huiusmodi onus compromissi seu laudi ad petitionem dictarum partium et pro bono pacis et concordiæ in se spontè susceperunt. Deinde anno, jndictione, mensis, die et hora quibus supra prænominatis, arbitri et arbitratores unanimi consensu nullo discrepantes cognita veritate præmissorum et de præmissis sufficienter instructi et informati bona et matura deliberatione præhabita dictauerunt, laudauerunt, pronunciauerunt et arbitrarunt in hunc qui sequitur modum: Primo, quod dicti domini præpositus conuentus et plebanus deinceps sint boni et sinceri amici et fautores et quod omnes discordiæ, rancores, controuersiæ, et dissensiones inter eosdem usque in hodiernum diem datum præsencium quomodolibet exortæ penitus extinctæ, sedatæ esse debeant et sopitæ. Secundo, quod præfatus dominus plebanus in Rhorbach pensionem annualem(11) præfato monasterio in Plaga, ut dicitur, de præfata ecclesia Rhorbach reseruatam et hactenus datam, nunc et in futurum sine contradictione aliqua ipsis dominis præposito et conuentui pro tempore existentibus tradere debeat et persoluere temporibus et locis suis congruis et consuetis, pæna sub infrascripta. Tertio pronunciarunt, arbitrarunt et laudarunt quod ipsi dominus præpositus et conuentus seu aliquis eorum nomine de cætero numquam jura parochialia in plebe dictæ parochialis ecclesiæ in Rhorbach uidelicet pueros baptisando, mulieres de partu exeuntes intronisando, seu aliqua alia ecclesiastica sacramenta(12) administrando exerceant, neque se de illis per amplius quouis modo sine consensu ipsius domini plebani pro tempore existentis sub pæna infrascripta intromittant aut se illis immisceant. Quarto, quod omnes fructus, prouentus et obuentiones(13) de supranominata capella lignea uulgariter Zum Heyligenstain prouenientes et plebano de iure et consuetudine cadentes, ipse plebanus pro tempore existens integre sine impedimento præpositi et conuentus et absque contradictione quorumcumque recipiet et in usus suos conuertet. Quinto et ultimo quod si quæ partium ab huiusmodi pronunciamento seu laude in parte aut in toto resilieret et recederet et huiusmodi laudem non seruaret quouismodo directè uel indirectè publicè uel occultè, extunc pars resiliens et non seruans pænam triginta duarum(14) librarum denariorum usualis et currentis monetæ parti seruandi persoluendi ipso facto irremissibiliter incurrat. Qua quidem pronunciatione facta præfati dominus præpositus et plebanus nominibus quibus supra huiusmodi pronunciamentum seu laudem approbarunt, laudarunt, ratificarunt et per omnia in ipsum pronunciamentum spontè et liberè consenserunt. Super quibus omnibus et singulis tam compromissarij quam arbitratores petierunt sibi a me notario publico infrascripto, vnum aut plura publicum seu publica confici instrumentum aut instrumenta. Acta sunt hæc in oppido Serleinspach(15) præmemoratæ diocæsis Pathauiensis in dote oppidi eiusdem, sub anno, indictione, mensis, die et hora quibus supra, præsentibus ibidem honorabilibus et circumspectis viris domino Rugero(16) in Gramanstetten, Bernhardo(17) in Schamhering et Vincentio Sannttlin(18) in Haslach, ecclesiarum parochialium rectoribus, Ioanne Räppel(19), oppidano in Perlensreutt, et Ioanne Amesperger(20), judice ab dem Aygen, laicis Pathauiensis diocesis testibus ad præmissa uocatis pariterque rogatis."||
||
[NOTARIATSSIGNET] "Et ego, Martinus Wielantinger(21), clericus Salzburgensis diocesis, publicus sacra imperiali auctoritate notarius, quia dictis, compromissioni, onerisque receptioni, arbitramenti pronunciationi ratam et gratam et habitationi omnibusque alijs et singulis præmissis dum sic (ut præmittitur) fierent et agerentur, una cum prænotatis testibus præsens interfui, easque sic fieri uidi et audiui, idcirco hoc publicum præsens instrumentum per alium me alijs arduis præpeditis negotijs fideliter scriptum existentem confeci, publicaui, et in hanc publicam formam redegi, signoque nomine ac cognomine meis solitis et consuetis consignaui in euidens testimonium omnium et singulorum præmissorum uocatus et specialiter requisitus."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 300, S. 323-326