"Ich Peter Schelmb(1) zuo der Weissenkirchen(2) vnd jch Vrsula sein hawsfraw, bekennen fuer vns vnd all vnser erben vnd tuen kund offennlich mit dem brieff allen den er fuerkumbt, daz vns die erwirdigen geistlichen herren, her Andre(3) brobst vnd der ganntz conuent des gotshaws zuo dem Slegel mit veraintem ratt jn bestants weis auff vnser obgenanter baider leib vnd lebtaeg, vnd nicht lenger, recht vnd redlich verlassen habent jren vnd jrs obgenanten gotshaws weingarten zwen, gelegen zuo der Weissenkirchen ann dem Weitenperg, genant dy Gaukchenberger(4), jn solher beschaiden, daz wir jn, jrem gotshaws vnd nachkomen, aus den obgenanten jren weingarten alle jar jêrlich raichen vnd geben suellen halben tail weins jn dem lesen vnd sullen jn denselben halben tail weins ann alls geuêr aus den weingarten antwuertten gen Weissenkirchen jn ain presshaws vnd aus demselben hinwider antwuerten jn jren hof gen Wesendarff(5) ann all jr muee, vnd jn der press bej der tailung suellen sew haben jren scheinboten, demselben suellen wir essen vnd trinkchen geben als lanng, vntz er von dem vessenn des weins muessig wirt. Sew suellen auch das pressloen von dem halben tail jrs weins ausrichten, vnd darczuo das purckrecht von den obgenanten jren weingarten auch jerlich selber geben. Auch sol man dy obgenanten baid weingarten zwir jm jar beschawen, zuo sannd Goergen tag vnd zuo sannd Giligen tag, mit vier erbern vmsaessen, also daz wir obgenant zwen leib die egemelten weingarten jnnhaben mit guetem paw, als solher gueter syt vnd gewanhait ist zuo Weissenkirchen. Begaeb sich aber, das die vier vmsaessen zuo yeder beschaw bei jren trewn erkennenten, daz die obgenanten jr weingarten nicht pêwlich lêgen als oben beruertt ist, so suellen wir obgenant zwen leib von allen vnseren rechten sein. Vnd wann wir obgenant zwên leib mit tod abgangen vnd jn leben nicht mer seien, mit wie getanem paw dann die obgenanten weingarten dieselb zeit ligund seien, so sind sy jn vnd jrem gotshaws fuerbaser ledig vnd loss warden ann aller vnser ander erben widerred vnd hindernuess angeuêr. Mit vrkund des briefs, besigelten mit der erbern Hainrich Teysenhofer(6) burger zuo der Weissenkirchen, vnd Andre Aichperger(7) gesessen zuo Wegschaid, baider anhangunden jnsigeln, die jch obgenanter Peter vnd jch Vrsula sein hawsfraw mit vleis darvmb gepeten haben, jn baiden vnd jren erben an schaden. Geben nach Cristj gepurd vierczehen hundert jar, vnd darnach jm fuemf vnd fumfczigissten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 351 (S 241), S. 380-381