"Ich Vlrich Wolffsfuertner(1) zw Neindling: Bekhenne offentlich mit dem brieff für mich vnd all mein erben, vnd thue khundt allermenigclich, das jch mit guetem willen vnd zw den zeitten, da jch es woll gethuen mechte, recht vnd redlich zw ainem ewigen, stätten khauff verkhaufft vnd zw khauffen geben hab vnd gib auch wissentlich in crafft diß brieffs dem edlen vessten Vlrichen Herleinsperger(2) zw Tannberg vnd seinen erben, ain guett, so jch gehabt hab zw Harbach(3), gelegen in Pfarrkhircher pfarr, jn Veldner lanndtgericht, da jezo Hännsl(4) aufsizt, vnd ist lehen von dem hochwürdigen bistumb zw Passaw. Das benant guett mit allen nüzen, gülten, diensten, zw haus, zw hoff, zw hollz, zw feldt, wismadt, waidt, wasser, grundt vnd poden, alls darein gehort vnd dauon bekhumben mügen, nichts ausgenumben noch hindan gesezt, alls jch es dann selber vnzher jngehabt, genüzt vnd genossen hab. Also hab ich es dem benanten Vlrichen Herleinsperger zw khauffen geben, vmb ein suma gellts, der jch von jhm gannz ausgericht vnd bezallt bin nach meinem benüegen. Darauf hab jch jm das benant guett [mit] aller zuegehörung, mit lehen herren hanndten vbergeben vnd eingeantwortt, jn solcher mainung, das er vnd sein erben nun fürbaß mit dem benantten guett zw Harbach allen jren nuz vnd frumben hanndlen vnd betrachten sollen vnd mügen, mit versetzen, verkhauffen, schaffen, vermachen vnd geben, wem sie wellent, ohn mein, obgenants Vlrichs Wolfsfuehrtner, meiner erben vnd ohn menigclichs von vnnsernt wegen jrrung vnd einsprechen. Wier verzeihen vnns auch des benanten guetts ut in forma commeti. ~ Zw vrkhundt gib jch obgenanter Vlrich Wolfsfuehrtner den brieff, besiglt mit meinem aignen anhangunden jnsigl, vnd zw gezeugnuß hab jch fleissig gebetten den edlen Jorigen Staspan(5), die zeit pfleger vnd lanndtrichter zw Velden, das er sein jnsigl darzue gehangen hat, jm vnd sein erben ahn schaden. Geben am montag vor sanct Thomans tag des h[eiligen] zwelff potten, alls man zelt nach Christi gebuertt tausent vier hundert vnd im fünfvndfünfzigisten jahr."||
||
[Postscripta:] 1) "Collat: gegen dem original, vnd erfindt sich gleiches jnhallts. Actum Lynnz, den 21. marty 1629. Leonhard Khapfer von Khapfenstein, landtschreiber."||
||
2) "Collat: gegen einer vidimierten abschrifft vnd erfindt sich gleiches jnhallts. Actum Lynnz, den 19 juny 1629. Leonhard Khapfer von Khapfenstain, Landtschreiber."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 692, S. 755