"Wir Vlrich(1), von Gottes genaden bischoue zw Passaw: Bekhennen, das vnns vnnser gethreuer lieber Vlrich Wolfsfurthner(2) zw Neundling ain guett zw Harbach(3) in Pfarrkhircher pfarr vnd Veldner landtgericht gelegen, vnnsers vnd vnnsers stiffts lehenschafft an seinem offen besiglten brieff aufgesandt vnd mit fleiss gebetten hat, dasselb vnnserm gethreuen lieben Vlrichen Herleinsperger(4) genedigclich zuuerleihen, wann er jme das hiet zw khauffen gegeben. Das haben wir gethan vnd dem benandten Vlrichen Herleinsperger das bemelte guett zw Harbach mit seiner zuegehörung verlihen. Verleihen jme auch wissentlich in crafft diß brieffs, was wir zw recht daran verleihen sollen oder mügen. Also, das er vnd seine erben das nun führan von vnns vnd vnnserm stifft jn lehens weis jnhaben, nüzen vnd niessen sollen vnd mügen, alls lehens, lanndts vnd vnnsers stiffts recht ist, doch vnns vnd demselben vnnserm stifft an der lehenschafft vnuergriffentlich, ohne geuerde. Mit vhrkhundt diß brieffs, geben zw Passaw, an dem H: weinacht abent, nach Christi vnnsers lieben herrn gebuertts jm 1455 jahr."||
||
[Postskript:] "Collat: gegen dem original vnd erfindt sich gleiches jnhallts. Actum Lynnz, den 14. februari, anno 1624. Jn Abwesen herrn lanndtschreibers: Sebastian Maurer(5), Expeditor."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 693, S. 755-756