"Beatissime pater, cum monasterium prepositure beate virginis Marie in Slaga(1), ordinis Premonstratensis, Patauiensis diocesis, in confinibus regni Bohemie consistens, in quo ad presens duodecim viri religiosi vnacum preposito(2) ipsius monasterij sub regula deguntur obseruantia, temporibus preteritis per jnfideles Bohemos(3) et crucis Christi jnimicos captiuum, spoliatum et jn suis structuris et edificijs jncendio(4) crudeliter deuastatum, et demum in rebus subditis et possessionibus deterrime depauperatum et dilapidatum existit, adeo per maximam et perniciosam ruinam, jnopinam et egestatem incurrit et patitur ita, ut absque christifidelium suffragio singularique subsidio in suis structuris et edificijs alijsque suis necessarijs restaurarj et recuperari minime potest. Vt igitur premissa eo prompcius fieri possint, cultusque diuinus jnibi ad laudes omnipotentis Dei, eiusque gloriosissime virginis matris [M.] habundiis amplietur, christifidelesque ipsi eo libencius deuocionis causa confluant ad illud, dignetur sanctitas vestra omnibus et singulis christifidelibus qui ecclesiam dicti monasterij in natiuitatis et annunciacionis eiusdem virginis Marie, ac ipsius ecclesie dedicacionis festiuitatibus deuote visitauerint annuatim, et ad reparacionem et constructionem eiusdem monasterij et ecclesie, ornamentorumque conseruationem eiusdem manus adjutrices porrexerint, pro qualibet festiuitatum huiusmodi septem annos et totidem quadragenas de jniunctis eis penitentijs perpetuis futuris temporibus misericorditer relaxare de gracia speciali; regula cancellarie et alijs gracijs non obstantibus quibuscumque, et omnj clausulo oportunum. Remitatur legato. Datum Rome, apud sanctum Petrum, sexto jdus junij, [Calisti pape](5) anno secundo."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 356, S. 384