"Wir Jan von Rosennbergk(1), hawptman in der Slesen, bekennen offenlich mit dem brieff vor allen, dy jn sehen, horen oder lesen, das vns der erwirdig gaistlich bruder Andre(2), brobst czu vnser frawen Slag in dem Muehel landt(3) fuerbracht vnd ermanet hat mit weilendt vnserer vorfaderen stifft brieffen, darin sein vorfaderen gotshaws vnd conuent begnadt vnd begabt sein mit vil stifft vnd gotsgaben, gnaden vnd kyrchlehen, vischwaiden, gejaiden, walden vnd anderen guteren von vnseren vorfaderen vnd pat diemitiklich jm seinem gotshaws conuent vnd nochkomen seliche vnserer vorfaderen gotsgab czu bestatten, auch sy hanthaben geruechten pey jrer mawt an dem hoff an der Wulta(4), auch der strassen fuer Wulta(5), als dy von alter her komen synd. Wenn ober wir nun aus sulichen vnserer vorfaderen briffen, stifften, gotsgaben, genaden pilleich bewegt werden, vnseren vorfaderen fuesspar in solichem nach czu folgen, vnd dem selbem gotshaws vnd vnserer stifft vnser hilff vnd gab auch czu beweisen, vnd vnser stifft czu meren vnd czu pesseren, vnd dy werich, die Got czue gepueren pillich mêr den czeitliche ding fueederen, vnd den geistlichen vnser gnad vnd hilff mittailen sullen, domit sy dem dinst Gotes desterpas auswarten muegen, haben wir des egenanten brobst gepet angesehen, vnd das wir sein vnd seiner brueder guten werich czu dem ewigen leben auch tailhafftig wuerden, vnd haben jm vnd seinem conuent, bruederen vnd allen jren nachkomen alle vnserer ||
vorfaderen gotsgab, nichcz ausgenomen, bestaett vnd bekrefftigt, wie sy die bis her gehabt vnd genossen habent, bestatten vnd krefftigen jn dy auch wissentlich in krafft des briffs. Wir begaben vnd begnaden sy auch hie mit vnd jren markt auff dem Aigen(6) mit drein hochen waegen vnd sechs nideren waegen, czu dem, wie dy strass von alterher komen ist auff den strassen fuer Wulta vnd Plan(7), von vns vnd allen vnseren erben vnd nochkomen vnd allen den vnseren, sêw vnd all jr nochkomen vngeirret czu lassen, noch se czu irren niemant gestatten, sunder se dobei vnd bei aller vnserer voruaderen stifft vnd gab vnd bei den drein hochen vnd sechs nyderen wagen hanthaben vnd beschirmen sullen vnd wellen, als sy dann von vnseren vorfaderen vnd von vns dorin bis hie her gehalten synd vnd des genossen vngeirret, mit vrkund des briffs, besigelten mit vnseren gresseren anhangunden jnsigel. Geben auff Crumpnaw, noch Cristi gepurd tausent vir hundert vnd dar noch jn dem siben vnd funffczigisten jare, des suntags vor sand Gilgen tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 360 (S 245), S. 388-389