"Wir Vlrich(1), von Gottes genaden bischoue zw Passaw: Bekhennen, das vnns vnnser lieber gethreuer Danckhart Herleinsperger(2) die nachgeschriben stuckh vnd zehent vnnsers vnd vnnsers stiffts lehenschafft an seinem offen besiglten brieffen aufgesandt vnd mit fleiß gebetten hat, die vnnserm lieben gethreuen Vlrichen Herleinsperger(3) seinem brueder zuuerleihen, wann er jme die zw khauffen geben hiet. Das haben wir gethan vnd dieselben stuckh vnd zehent dem benanten Vlrichen Herleinsperger verlihen, vnd leihen auch wissentlich mit dem brieff, was wir jm dann zw recht etwan verleihen sollen vnd mügen. Also, das er vnd seine erben die nun fürbaser von vnns vnd vnnserm stifft jn lehens weis jnhaben, nüzen vnd nüessen sollen vnd mügen, alls lehens, lanndts vnd vnnsers stiffts recht ist, doch vnuergriffen vnns vnd demselben vnnserm stifft an der lehenschafft, ohn ge.erdte. Vnd sein das die obgemelten stuckh vnd zehent: Von erst ain hoff zw Hundtprening(4) vnd ain hoffstath daselbs, gelegen in Rorbeckher pfarr. Jtem ein guett zw Gezing(5), jtem ain guett zw Öedenreuth(7) vnd ain hofstath daselbs, gelegen in Altenfeldner pfarr. Jtem auf einem guett zw Grämbsreith(6???) gannzen zehent, gelegen in Pfarrkhircher pfarr vnd alles in Veldner lanndtgericht. Mit vhrkhundt diß brieffs, geben zw Passaw, an St: Franciscus tag, nach Christi vnnsers lieben herrn gebuertt jm 1457. jahr."||
||
[Postskript:] "Collat: gegen dem original vnd erfindt sich gleiches jnhallts. Actum Lynnz, 14. februari, anno 1624. Jn abwesen herrn lanndtschreiber. Sebastian Maurer, Expeditor."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 696, S. 758-759