"Ich Stephan Egker(1), burger ze Euerding, vnd ich Magdalena sein eeliche hawsfraw, vergechn offenlich mit dem brief fuer vnns vnd all vnser erben vnnd thun kunndt allen den er fuerkumbt, das wir mit wolbedachtem muet, guetem willen vnd zw der zeit, do wir das an maeniklichs jrrunng vnd widersprechen wol thun mochten, recht vnnd redlich verkawfft vnnd ze kawffen geben haben zw ainem staeten kawff vnd ewigêr fuerczicht vnnser drey weingartn bey Asschach in Rueprechtinger pewnt(2), der ain genannt der Topelweingartn(3) mit sambt der press, der an der ain seitten an Thoman des Fergen(4) weingarten gelegen ist, vnd stoest mit dem nidern ort an den weingarten, genannt der Flaisch(5), dauon man jaerlich zu purckrecht gibt ze sand Michels tag in das gericht ze Asschach zwainczigk phennig, der annder weingartn ist freys aigen vnd ligt zwischen des benannten Topelweingarten vnd der Holczgassen, vnd der dritt weingartn ist genannt der Kurcz(6), gelegen neben Stephan des Soeperl(7) vnd Vlreichs Pinntêr(8) der paider weingartn vnd stoest mit dem obern ort an Erharten des Schmids(9) weingarten, vnd mit dem nydern ort an den benannten Toplweingarten, dauon man jarlich gibt zw sannd Michels tag zw purckrecht in das gericht ze Asschach zweliff phennig vnd nicht mer. Dieselben obgenannten drey weingarten mitsambt der press vnd aller zugehoerung, als die allenthalben mit rain, stain vnd marchen vmbfanngen vnd von alltêr herkoemen sind, haben wir verkawfft dem erbern weisen Sigmunnden Lieber(10) dieczeit mawtter ze Asschach, Kathrein seiner hawsfrawn, vnd allen seinen erbenn vmb ain summ gelts, der wir ganncz beczalt sein an all vnnser schaeden. Wir haben in auch die benannten drey weingarten mitsambt der press vnd jrer zugehoerung zw staetem kawff vnd ewiger fuerczicht eingeantwort vebergeben vnd mit purckherren vnd gerichts hannden bestaett, aws vnnser nucz vnd gewêr jn jr nucz vnd gewêr, das sew die fuerbaser sullen jnnehaben, pawen, nueczen vnd niessen, damit hanndln, tun vnnd lassen, verseczen, verkawffen, schaffen, machen vnd geben, wem sew verlusst an vnnser vnd maenigklichs von vnnsern wegen jrrung vnd hindernuss. Wir sein auch der obgenannten weingarten, jr zugehoerung, zw kauff jr recht gewêrn vnd fuerstanndt fuer all rechtlich ansprach, wo jn des not beschicht, als soelichs kawffs, purckrechts, der grafschaft zw Schawnberg vnd des lannds ob der Enns recht ist. Ging in aber an der gewerschafft irs kawffs mit dem rechtten von vnsern wegen icht ab, oder das in kainerlay krieg oder jrrung darjnne auferstuennde mit dem rechtten, wie sich das fuegtte, des sy zu schaden kaemen, denselben schaden allen zusambt jrem obuerschriben kawff vnd gewerschafft suellen vnd wellen wir jn ganncz vnd gar ausrichten vnnd widerkeren an all jr schaeden, vnd sullen sew das alles haben vnd bekomen, dacz vnns, vnnsern erben vnd trewen darczue vnuerschaidenlich auf allem vnnserm anligkunnden vnd vorunndem guet, so wir veberall ynndert haben, gewinnen oder lassen, darjnne nichts ausgenomen angeuer. Dahin suellen sy an aller stat vmb jren obuerschriben kawff, gewerschafft vnd schaeden allew jrew rechten, geistlich vnd weltlich, erlanngt vnd behabt haben, vnd wir vnrecht vnd verloren, wie das fuerkumbt. - Des ze vrkunndt geben wir in den brief, besigellten mit der ersamen vnd weisen Wolfganngen von Hilkering(11) dieczeit marcktrichter ze Asschach, vnd Erharten des Althaimer(12) dieczeit lanndrichter jm Aschachwinnckel, baider anhangunnden jnsigel, die wir mit vleiss darumb gepeten haben, jn vnd jren erben an schaden vnd vnuergriffenlich der obgenannten herschafft an jrem purckrecht, vnnder das jnsigel wir vnns in massen, als wir oben vergechen, verpinnten mit vnsern trewen in aydes weise, alles das war vnd staet zu hallden, das der prief jnnehelt. Der geben ist an sambstag sannd Tyburczn vnnd Valerian tag, nach Kristi geburd vierczechen hunndert jar, vnd darnach in dem newnundfuennfczigissten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 370 (S 254), S. 399-400