"In nomine Domini. Amen. Wir Andre brobst(1), Achacz prior(2), vnd gemainkchleich der gancz conuent der wirdigen stifft vnd gotshaws zu vnser frawen Slag, des ordens von Premonstrat, Passawer bistumb. Bekennen aintrachtikleich fur vns vnd all vnser nach komen, vnd tuen kundt mit dem offen brief allen den er fuerkumbt, dy jn sehen, horen oder lesen, das der ersame her Mert Graeslar(3) dy zeytt vicari ze Peylstain, das guet zu Ogsel slag(4), dar auf dan dy zeytt der Freytag(5) gesessen ist, das sein kchawfts guet gewesen ist, mit aller seiner zuegehoerung jn vnser gotshaws vmb ain ewigen jartag gestifft vnd geaigendt hat, darumb wir vnd all vnser nachkomen jm vnd seinen voruodern ainst jm jar begeen schullen vnd wellen jn vnserm gotshaws, conuent vnd bruederschafft des mittichen vor mitter vasten, am abendt mit ainer gesungen vigily, vnd des phincztag margens mit ainem gesungen sel ambt, vnd yeder conuent brueder, so vil der zu den zeiten sein, mit ainer gesprochen sel mess, auch mit gelewtten, liechten, so dan darzue gehort nach gewonhait vnsers gotshaws; auch das wir vnd all vnser nachkomen, wan der jartag gehalten werd, auff der kanczel vmb sein vnd seiner voruodern sel vnd vmb alle, die aus dem geslaecht verschaiden sein, jn der gemain pitten schullen. Darauff geloben wir fur vns vnd all vnser nachkomen mit vnsern trewen jn krafft des brieffs, den obgenanten jartag jn obuerschribmer mass ze halten vnd volbringen. Geschaech aber des nicht, das wir den obgestimbten jartag jnder acht oder vierzehen tagen auffs lengist nicht ausrichtaeten vnd volbraechten, wan wir oder vnser nachkomen des vber griffen wurden, dan so sey wir dem Jorger(6) oder wer vogt hêr ist, vber das guet zu pen veruallen ain phundt wax, vnd mag dy selben nuecz auf dem obgenanten guet vmb den versawmbten gotsdienst vnd jartag nyder legen als lang, vnczt solicher jartag vnd versawmbt gotsdienst gancz vnd gar erstatt vnd volbracht ist warden, dan so schullen dy nyder gelegten nuecz auf dem egemelten guet vmb den versawnbten gotsdienst dem benanten gotshaws vnser frawn Slag wider ledig sein an maenikleichs hindernues, jrrung vnd wider sprechen. Daruber zu ainer waren vnd staeten vrkund geben wir den offen brieff mit vnsern obgenanten Andre brobst zu vnser frawn Slag vnd des conuents daselbs aigen anhangunden jnsigeln, darunder wir vns fur vns vnd all vnser nachkomen verpinden mit vnsern trewen, alles war vnd staett ze halten, das oben an dem brieff geschriben stet, der geben ist nach Cristi gepurd vierczehen hundert vnd jm vier vnd sechzygisten jare, an sand Johanns vnd sand Pauls tag der weter herren."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 402 (S 282), S. 439-440