"Ich Hanns Aichperger(1), gesessen zw Vischpâch, vnd ich Katrey(2) sein swêster, gesessen zw Mukchenslag, wir wekenen waidew mit ein ander fuer vns vnd vnser erben mitt dem offen wriff allen, dew jn sechntt, herntt lessen, von solher zuspruech vnd erbschaft wegen, so wir gehabtt haben zw vnsern swaegern, zw der Aichpergerin zw Wegschaidt, Andre des Aichperger(3) sollingne witthumb [!] von solher zwspruech wegen, so wir gehabt haben zw dem haws des Andre Aichperger(4) salliger hinder sein lassen haett, vnd zwo hoffstêtt mitt aller zw gehoerung, dew zw dem haws vnd zw der hoffstaett rechtlichen dem dar zw gehoerntt, vnd auff allew andrew farundew hab vnd auff andrer all seiner gueetter, nichs ausgenomen noch hin dan gesundert. Sollich vnser erbschaft, was wir da gehabt haben, nichs ausgenomen, dew selb erbschâft vnd zw spruech, dew geb wir vber vnsseren guetten frewndt vnd swaeger Hannssen dem Graeshawp(5) gesessen zw Peilstain jm vnd sein erben jn kraft des brieffs in solher mainung, das er nu furbas, er vnd sein erben, von der frawen der Aichpergerjn woll ein bringen mag mitt recht oder an recht, wie jm das amb aller westen fueglich ist, mitt der gueettichkaitt, das hatt er vnd sein erben vollingen vnd ganczen gewallt, an zw bringen an vnser staett, alls wir selbs gegenwurttig da ||
waeren. Das ist alles vnser guetlich will vnd wârtt, vnd hatt auch der wenantt Hanns Graeshawp jecz zw Peilstain, vmb vnser erbschaft vnd zwspruech, so wir gehabtt haben auff das Andre Aichperger haws vnd hofstett vnd all seinem guett, das er hinder seiner lassen hatt, vmb solich vnsere zw spruech, da hatt vns der wenantt vnser swager Hanns Graeshawp icz gesessen zw Peilstain, ain sum gelt geben hatt, der vns woll genueegt hatt, vnd furbas genueegen soll, der wir von jm schan ausgericht vnd bezallt sein worden zw rechter weill vnd zewtt, an allen vnseren schaden, vnd wellen jm auch dem wenanten Hannssen Grashawppen, gesessen zw Peilstain, noch nyemantt von vnsern wegen von solher einpringen wegen kainen puerg nicht thuen wellen, wir noch vnser erben, noch nyemantt von vnseren wegen trewlich vnd vngeuerlich. Wir haben auch vleis gepetten Hanns Aichperger gesessen zw Vischpach, vnd Katrej, meiner swester zw Mukchenslag, den erbern vnd weissen Hannssen Stadlinger(6) an der zewtt markchtrichter zw Haslach, vnd Jacoben Lobischinger(7) lanttrichter dasselbs, das sew jrew jnsigll zw pesserer sicherhaitt vnd pestatt an den brieff gehangen haben, doch jn vnd jren erben vnd jnsigll an schaden. Der brieff ist geben, alls man zallt nach Kristj gepurtt jm virzechen hundertt vnd jm vir vnd sechczisten jar, des erichtags vor goczleichnamstag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 401 (S 281), S. 438-439