"Ich Caspar Herleinsperger(1), die zeit pfleger zw Orth: Bekhenne offentlich mit dem brieff vnd thue khundt allen, den er fürkhumbt, sehendt, hörendt oder lesendt, von wegen der ansprach, zuesprüch, forderung vnd schadt, so sich halten vnd begeben haben zwischen des edlen Veithen Herleinsperger(2), meines lieben vettern vnd seiner geschwistreth, darumb er sich angenumben hat, ainsthaills, vnd zwischen des edlen Vlrichen Herleinsperger(3) zw Tanberg, auch meines lieben vettern, vnd Elspethen(4), Achazen Kherschperger seligen wittiben vnd jrer khinder, des anndern thaills: Von erst vmb die sprüch, so der bemellt Veith Herleinsperger gesezt vnd ze sprechen hat, von wegen eines hinder gangs vnd anlas, alls er gethon vnd hinder den gemelten Vlrichen Herleinsperger gegangen, auch vmb den khauff, alls er den obern hoff zw Hofhaimb(5) genant, im obern Prüell(6) hofstat vnd aw, von der ehegenanten Kherschpergerin vnd von jrem sohn khaufft hab; vnd vmb die sprüch, so der obgenant Vlrich Herleinsperger anstatt sein selbs vnd von wegen der vorgenanten Kherschpergerin vnd jrer khinder, zw dem ehegenanten Veithen Herleinsperger widerumb gesezt vnd zw sprechen haben gehabt, von des nidern hoffs wegen zw Hofhaimb, genant im nidern Prüell hofsteten vnd auen daselbst, auch vmb behabte erlangte gericht, so der gemellt Vlrich Herleinsperger zw Veithen Herleinsperger erlangt vnd behabt hat, antreffent die höff vnd aw zw Hofhaimb, auch ain halben zehent, so von Vlrichen Herleinsperger lehen ist, auf dem nidern hoff daselbs, darzw vmb all die sprüch vnd schäden, so ain thaill zw dem andern vnzt auf den tag, datum des brieffs, ze sprechen haben gehabt, auch was sich darundter mit wortten vnd werckhen verloffen vnd ergangen hat, nichts ausgenumben noch hindan gesezt, sonnder alles hierin beschlossen, derselben jrer sprüch sie zw baiderseits bei mir obgenantem Caspar Herleinsperger bliben vnd hinder mich gangen sein, nach jnhallt des anlaßbrieff, so jch von jn hab, vnd nach jrer baider fleissiger gebett sey zw beederseits zw entschaiden, auf das jch mich in den sachen aigentlich erkhundig vnd erfahren hab, alls jch das auf das chrendlichist hab khünen vnd mügen. Vnd sprich darauff von erst, was sich vndter den dingen vnd sachen von anfang vnzt her auf den tag, datum des brieffs, verloffen vnd vergangen hat, jn vnwillen, feindtschafft, wortten, werckhen, auch allen schaden vnd jrrung, nichts ausgenumben noch hindan gesezt, gannz ab vnd hin, vnd sprich darnach Veithen Herleinsperger den nidern hoff vnd hofstath zue, alls er die mit gwehr jnhat, mit sambt jren zuegehör; darnach sprich jch den obern hoff, alls Vlrich Herleinsperger von der Kherschpergerin vnd von jrem sohn khaufft hat, mit sambt der hofstath, da der Schöberl(7) aufsizt, Vlrichen dem Herleinsperger zue, mit jren zuegehörung; darnach sprich jch einen aufgabbrieff von Veithen Herleinsperger vmb die lehen über den obern hoff zw Hofhaimb, an meinen genedigen herrn von Passaw, Vlrichen Herleinsperger lauttendt. Jch sprich auch, das nun hinfür jeder thaill jnhallt meines spruchs mit seinem thaill seinen frumben hanndlen soll, ohn des anndern jrrung vnd einsprechen, threulich vnd vngefehrlich. NB Vnd wierdet in dem gannzen compromiss ainziger puechstaben nit erfundten, das obermelter hoff verstifftet gewesen were. Des zw vhrkhundt gib jch obgenanter Caspar Herleinsperger meines spruchs jedem thaill in gleicher lautt einen spruchbrieff, besiglt mit meinem anhangendten jnsigl, mir vnd mein erben ohn schaden. Geben nach Christi gebuerth tausent vierhundert jm fünfundsechzigisten jahr, am pfingstag vor vnnser lieben frauen tag zw liechtmessen."||
||
[Postscripta:] ||
1) "Collat: gegen dem original vnd erfindt sich gleiches jnhallts. Actum Lynnz, den 22 marty, anno 1629. Leonhard Khapfer von Khapfenstein, lanndtschreiber."||
||
2) "Collat: gegen einer vidimirten abschrifft, vnd erfindt sich gleiches jnhallts. Actum Lynnz, den 19 juny, anno 1629. Leonhard Khapfer von Khapfenstain, lanndtschreiber."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 699, S. 760-761